ۋكراينا مەن ونىڭ وداقتاستارى حالىقارالىق قىلمىستىق سوتتىڭ شەشىمىمەن رەسەي پرەزيدەنتى ۆلاديمير ءپۋتيندى قاماۋعا الۋدان باس تارتقان موڭعولياعا قارسى شارا قولداناتىنىن ايتتى، دەپ حابارلايدى "ادىرنا" ۇلتتىق پورتالى.
بۇل تۋرالى ۋكراينا سىرتقى ىستەر مينيسترلىگىنىڭ رەسمي وكىلى گەورگي تيحي X الەۋمەتتىك جەلىسىندە حابارلادى.
«موڭعوليا ۇكىمەتىنىڭ ءپۋتيندى قاماۋعا الۋ جونىندەگى حقك وردەرىن ورىنداۋدان باس تارتۋى – حالىقارالىق قىلمىستىق سوتقا اۋىر سوققى...»، - دەدى.
پۋتين دۇيسەنبى كۇنى موڭعوليا ەلىنە ءىس-ساپارمەن كەلدى. رەسەي پرەزيدەنتى حالحين-گولداعى كەڭەس پەن موڭعول قارۋلى كۇشتەرىنىڭ بىرلەسكەن جەڭىسىنىڭ 85 جىلدىعىنا ارنالعان مەرەكەلىك شارالارعا قاتىستى. سونىمەن قاتار، تاراپتار تار جانە كەڭەيتىلگەن قۇرامدا كەلىسسوزدەر جۇرگىزەدى.
رەسەي پرەزيدەنتىنىڭ ساپارى حالىقارالىق قىلمىستىق سوتتىڭ ونى «قاماۋعا الۋ تۋرالى» وردەرىنە قاتىستى داۋ-داماي تۇسىندا ءوتىپ وتىر. مەملەكەت باسشىسىنىڭ ءباسپاسوز حاتشىسى دميتري پەسكوۆ جۋرناليستەردىڭ وسى ماسەلە بويىنشا ازيا رەسپۋبليكاسىنىڭ بيلىگىمەن كەلىسسوزدەر جۇرگىزىلگەنى تۋرالى سۇراعىنا جاۋاپ بەرە وتىرىپ، ساپاردىڭ بارلىق اسپەكتىلەرى مۇقيات دايىندالعانىن ايتتى.
