قازاقستان بيلىگى رەسەيمەن بىرگە +7 ءنومىرىن پايدالانۋدى تالاپ ەتۋدە، دەپ حابارلايدى “ادىرنا” ۇلتتىق پورتالى.
«قر ءتسدياوم (قازاقستان رەسپۋبليكاسى تسيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگىنىڭ) «قازاقستان رەسپۋبليكاسىنىڭ ۇكىمەتى مەن رەسەي ۇكىمەتى اراسىنداعى +7 نومىرلەۋىن بىرلەسىپ پايدالانۋ تۋرالى كەلىسىمگە قول قويۋ تۋرالى» ۇكىمەت قاۋلىسىن دايىندادى»، - دەپ حابارلادى ءتسدياوم ءباسپاسوز قىزمەتى.
اتاپ وتكەندەي، قازىرگى ۋاقىتتا ەكى ەلدىڭ بايلانىس ۆەدومستۆولارى اراسىندا جاسالعان كەلىسىم كۇشىندە.
«2021 جىلى جەكە كود الۋ ءۇشىن قازاقستان ءۇشىن +997 حالىقارالىق تەلەفون كودى ساقتالدى. بايلانىس وپەراتورلارىمەن جاڭا كودقا كوشۋ ماسەلەسىن تالقىلاۋ بارىسىندا جاڭا كودقا كوشۋدىڭ مۇمكىن بولاتىنى، بىراق بىرقاتار قارجىلىق جانە تەحنولوگيالىق پروبلەمالاردى تۋدىراتىنى ايتىلدى. سونداي-اق، وتاندىق بايلانىس وپەراتورلارىنىڭ بارلىق ابونەنتتەرى مەملەكەتتىك جانە بانكتىك قىزمەتتەردى، الەۋمەتتىك جەلىلەردى جانە ءتۇرلى قوسىمشالاردى الۋ بويىنشا بارلىق قىزمەتتەردەگى دەرەكتەرىن جاڭارتۋى قاجەت»، - دەپ ءتۇسىندىردى ۆەدومستۆودان.
تيىسىنشە، ءتسدياوم مالىمەتتەرى بويىنشا، «اۋىسۋ كەزەڭىندە ساتسىزدىكتەر مەن جاعىمسىز تاجىريبەلەردىڭ بولۋ ىقتيمالدىعى جوعارى».
«وسىعان بايلانىستى، قر ءتسدياوم ازاماتتارىنا ىڭعايلى بولۋ ءۇشىن حالىقارالىق ەلەكتر بايلانىس وداعىمەن قايتادان كەلىسسوزدەر جۇرگىزىلىپ، +7 حالىقارالىق كودىن وزگەرىسسىز قالدىرۋ تۋرالى شەشىم قابىلداندى. وسىعان بايلانىستى رەسەي فەدەراتسياسىنىڭ تسيفرلىق دامۋ، كوممۋنيكاتسيالار جانە بۇقارالىق كوممۋنيكاتسيالار مينيسترلىگىمەن رەسەي فەدەراتسياسىنىڭ ۇكىمەتى مەن قازاقستان رەسپۋبليكاسىنىڭ ۇكىمەتى اراسىندا نومىرلەۋدى قولدانۋ تۋرالى جاڭا كەلىسىم جاساۋ ماسەلەسى پىسىقتالدى. قازىرگى ۋاقىتتا جوبانى ماقۇلداۋ تۋرالى رەسەي فەدەراتسياسىنان نوتا الۋ كۇتىلۋدە»، - دەلىنگەن حابارلامادا.
