تسيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى جاسلان ماديەۆ قازاقستان جۋرناليستەر وداعىنان كەيىن Telegram مەسسەندجەرىنىڭ نەگىزىن قالاۋشى پاۆەل دۋروۆتى قولدادى، دەپ حابارلايدى “ادىرنا” ۇلتتىق پورتالى.
“مەن پاۆەل دۋروۆقا جانە Telegram كومانداسىنا سوڭعى وقيعالارعا بايلانىستى قولداۋىمدى بىلدىرگىم كەلەدى. سەنبى كۇنى پاۆەلدىڭ فرانتسۋز بيلىگىمەن كونتەنت مودەراتسياسىنىڭ جوقتىعى جانە قۇقىق قورعاۋ ورگاندارىمەن ىنتىماقتاستىقتان باس تارتقانى ءۇشىن ۇستالعانى حابارلاندى” دەپ جازدى ول Facebook پاراقشاسىندا.
قازاقستان رەسپۋبليكاسى تسيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگىنىڭ اتىنان مينيستر Telegram كومانداسىمەن ءوزارا ارەكەتتەسۋدە وڭ تاجىريبە جيناقتاعانىن اتاپ ءوتتى.
“قر تسيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگى اتىنان Telegram كومانداسىمەن ءوزارا ارەكەتتەسۋدىڭ وڭ تاجىريبەسى قالىپتاسقانىن اتاپ وتكىم كەلەدى. ءبىز دەربەس دەرەكتەردىڭ تارالۋىن، ەسىرتكى ترافيگىمەن كۇرەس جانە مەسسەندجەردەگى باسقا دا زاڭسىز ارەكەتتەردى توقتاتۋ بويىنشا ماسەلەلەردى بىرنەشە رەت ءساتتى ءارى جەدەل شەشتىك. Telegram كومانداسى ءاردايىم ازاماتتاردىڭ قاۋىپسىزدىگىن قامتاماسىز ەتۋ ءۇشىن ىنتىماقتاستىققا دايىن، قۇپيالىلىق پەن ءسوز بوستاندىعىن قورعاۋ قاعيداتتارىنا ادال بولىپ كەلەدى” دەپ قوستى ول.
سونداي-اق، ول تەلەگرام قوسىمشاسىنىڭ قازاقستاندا تانىمال جەلى ەكەنىن اتاپ ءوتتى.
“قازاقستاندا Telegram – ەڭ تانىمال مەسسەندجەر، ونى 12 ميلليوننان استام ادام پايدالانادى، بۇل ونىڭ قوعامىمىز ءۇشىن قانشالىقتى ماڭىزدى ەكەنىن كورسەتەدى. ءبىز تسيفرلىق كەڭىستىكتە قاۋىپسىزدىك پەن ەركىندىك اراسىنداعى تەپە-تەڭدىكتى ساقتاۋدىڭ ماڭىزدىلىعىن تۇسىنەمىز جانە Telegram-مەن كونسترۋكتيۆتى ىنتىماقتاستىقتى جالعاستىرۋعا دايىنبىز” دەدى جاسلان ماديەۆ.
سونىمەن بىرگە ول دۋروۆتىڭ كومانداسىنا بالالاردىڭ دامۋىنا شىنايى قىزىعۋشىلىق تانىتقانى ءۇشىن العىسىن ءبىلدىردى.
“سونىمەن قاتار، پاۆەل دۋروۆ قازاقستانعا وتكەن ساپارىندا قازاقستاندىق اۋىل بالالارىنا قولداۋ كورسەتۋگە باعىتتالعان «IQanat» جوباسىنىڭ قامقورشىلارىنىڭ ءبىرى بولىپ، $365 000 سوماسىنا 12 گرانت ءبولدى. ول تەك قارجى بولۋمەن شەكتەلمەي، وقۋ پروتسەسىن زەرتتەۋگە، بالالاردى ىرىكتەۋگە، ولاردىڭ ءومىربايانى مەن مەكتەپتەگى ۇلگەرىمىن زەردەلەۋگە تىكەلەي قاتىستى” دەپ جازدى ماديەۆ.
ەسكە سالا كەتەيىك، 24 تامىزدا دۋروۆ فرانتسيانىڭ لە بۋرجە اۋەجايىندا ۇستالعان بولاتىن.
