قازاقستاندا مەكتەپ ديرەكتورلارى ەندى ەكى جىلعا تاعايىندالىپ، جاقسى ناتيجە كورسەتسە قىزمەتى تاعى ەكى جىلعا سوزىلادى. بۇل وقۋ-اعارتۋ ءمينيسترى جۇلدىز سۇلەيمەنوۆا مالىمدەدى، دەپ حابارلايدى "ادىرنا".
ءمنيستردىڭ ايتۋىنشا، قازاقستاندا مەكتەپ ديرەكتورىن 2 وقۋ جىلعا تاعايىنداۋ، ال جۇمىسى جاقسى بولسا، ودان ءارى 2 جىلعا ۇزارتۋ، بىراق 4 وقۋ جىلىنان اسىرماۋ قاجەت. بۇل ۇسىنىستى جاقىن ارادا ءمينيستردىڭ بۇيرىعى رەتىندە بەكىتۋ جوسپارلانىپ وتىر.
"مەنىڭ مينيستر رەتىندەگى پوزيتسيام بويىنشا، ديرەكتور ەكى وقۋ جىلىنا تاعايىندالۋى ءتيىس. سودان سوڭ، ونىڭ جۇمىسى جاقسى بولسا، مەكتەپتەگى ءبىلىم ساپاسى جاقسارسا، بالالاردىڭ ءبىلىم دەڭگەيى ارتسا، قاۋىپسىزدىك پەن مۇعالىمدەردىڭ بىلىكتىلىگى ماسەلەسى جاقسارسا، وندا باسشىلاردىڭ قىزمەتىن تاعى ەكى جىلدىق مەرزىمگە ۇزارتۋعا بولادى", – دەدى جۇلدىز سۇلەيمەنوۆا.
ءمينيستردىڭ سوزىنشە، مۇعالىمدەر تاراپىنان ديرەكتوردىڭ وزبىرلىعىنا قاتىستى ءبىراز شاعىمدار تۇسكەن.
"ديرەكتور – ءبىلىم بەرۋدى، وقۋ پروتسەسىن ۇيىمداستىرۋشى مامان عانا. بىراق، ول ءوزى دە جاقسى، بىلىكتى ۇستاز بولۋى ءتيىس", – دەدى مينيسترلىك باسشىسى.
قازىر ەلدە مەكتەپ ديرەكتورلارى 4 جىلعا تاعايىندالادى. بىراق مەكتەپتەردە مەكتەپ ديرەكتورلارىنىڭ روتاتسياسى ءجيى بولا بەرمەيدى. 2021 جىلى مينيسترلىك كەيبىر مەكتەپتەردە ديرەكتورلار 10 جىلدان اسا ۋاقىت وتىرعانىن مويىنداعان.
