دوستىق ادامزات اتاۋلىعا بەرىلگەن ەڭ اسىل قاسيەتتەردىڭ ءبىرى. ونىڭ قادىر-قاسيەتىنە جەتە بىلگەن جان شىنايى باقىتتى. دوستىڭ سانى دا، ساپاسى دا كوپ. بىراق سول جاقىنىڭنىڭ ىشىنەن سەنىڭ جان دۇنيەڭدى كوز جانارىڭنان-اق مۇلتىكسىز تۇسىنەتىن، قيىن ساتتە قولداۋ بولاتىن جاناشىر ساۋساقپەن سانارلىق. سول سياقتى دوستىڭ دا وزىندىك دەڭگەيى، مارتەبەسى بولادى. ءبىرى بالا شاقتان بار قىزىقتى بىرگە كورىپ، ءبىر ءۇزىم ناندى ءبولىسىپ كەلە جاتقان دوس بولسا، ەندى ءبىرى ءومىر اعىسىمەن جولدان قوسىلعان جولداس تا كەزدەسەدى. ەڭ باستىسى وزىڭىزگە جاقىننىڭ ارا-جىگىن دۇرىس اجىراتا ءبىلۋ. باسىڭا ءىس ءتۇسىپ ءومىردىڭ ءتۇرلى سىن ساتتەرىندە ساعى سىنباي سەنى جەتەلەي بىلسە وندا سەرىگىڭنىڭ سەنىمدى بولعانى. ال، الدەبىر قىزىعۋشىلىققا باعىتتالعان ماقساتى بولسا وندا ويلاعانىڭنىڭ ورىندالماعانى دەپ بىلەمىز.
اسكەر دوستاردى ءبىر-بىرىمەن جاقىنداستىرادى. قاتارداعى ءدىناسىلوۆ ابىلاي مەن ۋسماناليەۆ راحات ەكەۋى قازىر الىپ مەگاپوليستەگى 5571 اسكەري بولىمىندە وتان الدىنداعى بورىشتارىن وتەپ ءجۇر. ەكەۋى دە شىمكەنت قالاسىنىڭ تۋماسى. مەكتەپ قابىرعاسىنان بەرى بىرگە دوس بولىپ كەيىننەن جوعارى وقۋ ورنىنا تۇسەدى. ۋنيۆەرسيتەت قابىرعاسىندا ستۋدەنتتىك كەزەڭنىڭ ەڭ قىزىقتى شاقتارىن وتكەرىپ، وقۋلارىن وقىپ ون سەگىزگە تولا سالىسىمەن الدىمەن ءدىناسىلوۆ ابىلاي اسكەر قاتارىنا شاقىرىلادى. ابىلاي، اسكەر ءاربىر ەر ازاماتتىڭ وتان الدىنداعى بورىشى، مىندەتى ەكەنىن جەتە تۇسىنەدى. ءسويتىپ وزىمەن بىرگە دوسىن الىپ كەتۋدى ءجون سانايدى. وسىلايشا، ادال دوستار كەلىسىمىگە كەلىپ، سەرتتەسىپ وقۋلارىن ۋاقىتشا توقتاتىپ 1-2023 جىلعى شاقىرىلىممەن كەڭەس وداعىنىڭ باتىرى، گۆارديا پولكوۆنيگى باۋىرجان مومىشۇلى اتىنداعى 5571 اسكەري بولىمىنە تۇسەدى. قىزىعى، قاتارداعى قوس جاۋىنگەر ءبىر ۋاقىتتا ءبىرىنشى جەدەل ماقساتتاعى باتالونعا ءبىرىنشى روتاعا تاپ بولادى. قىزمەت كەزىندە دە ەڭ العاشقى جاساققا دا بىرگە تۇسكەن.
– ءبىر قالادا ءوسىپ، ءبىر اسكەري بولىمگە تۇسكەن ەكەنسىزدەر. بىزبەن بولىسەر قانداي قىزىقتى جاعدايلارىڭىز بار؟
ء–بىزدىڭ باسىمىزدان وتكەن قىزىقتار ەڭ العاشقى وقۋ-جاتتىعۋ كەزىنەن باستاۋ الدى. وسى جەرگە كەلىپ ءبىزدىڭ دوستىعىمىز ودان سايىن نىعايا ءتۇستى. ءبىر روتا بولعاننان كەيىن كۇنىگە ۋاقىتتى بىرگە وتكىزەمىز.كادىمگى ءبىر ءۇيدىڭ بالاسىنداي ەتەنە –جاقىن ارالاسىپ كەتتىك. ۋاقىتتى تا وتە پايدالى ءارى قىزىقتى وتكىزۋگە تىرىسىپ ءجۇرمىز. اسىرەسە، اسكەردەگى ەستەلىكتەر بىزگە وتە قىزىق، وزىمىزگە قاتتى ۇناپ جاتىر. ءبىر- بىرىمىزگە قولداۋ كورسەتىپ جۇرگەننەن كەيىن دە ۋاقىتتىڭ قالاي تەز ءوتىپ جاتقانىن اڭعارماي قالدىق. ويلاڭىزشى، اسكەرگە كەلگەنىمىزگە دە توعىز ايدان دا اسىپتى. ساناۋلى كۇندەردەن كەيىن ءۇي-ىشىمىزبەن، اعايىن-تۋعانمەن قايتا قاۋىشامىز، دەيدى قاتارداعى راحات ۋسماناليەۆ.
– راحاتتىڭ ادامگەرشىكلىك قاسيسەتتەرى وتە كوپ. ول وتە اقىلدى. كەز كەلگەن نارسەنى دۇرىس پايدالانا الادى. ءار سيتۋاتسيانى باسقارا بىلەدى. اقكوڭىل، جاناشىر. ورتادا ابىرويلى، ادال. ءتىل بايلىعى دا جاقسى. مەنىڭ كوڭىلىمە ەڭ جاقىن تارتقان قاسيەتى ول ءوزى ايتقان سوزىندە تۇرادى. سەنىمدى سەرىك. سول ءۇشىن دە مەن دوسىمدى ەرەكشە باعالايمىن. سوندىقتان دا مەن دوسىم ءۇشىن بارلىعىنا دايىنمىن. اقتىق دەمىم قالعانشا ادال بولۋعا، كەز كەلگەن جاعدايدا كومەك بەرۋگە دايىنمىن، - دەيدى ابىلاي ءدىناسىلوۆ.
– ابىلاي، راحات وزدەرىڭىز دە جوعارىدا ايتىپ وتكەندەي اسكەر سىزدەردىڭ دوستىق قارىم-قاتىناستارىڭىزدىڭ نىعايا تۇسۋىنە سەپ بولدى. ال، وسى ۇلتتىق ۇلانعا كەلگەلى وزدەرىڭىزدىڭ جەكە قاسيەتتەرىڭىزدە وزگەرىس بار ما؟ اسكەر نەنى ۇيرەتتى؟
– بىزگە اسكەر شىدامدىلىقتى، توزىمدىلىكتى ۇيرەتتى. ۇلكەن جاۋاپكەرشىلىكتى سەزىندىك. بۇعان دەيىن ءار ءۇيدىڭ بالاسى بولساق، قازىر حالىقتىڭ بالاسى ەكەنىمىزدى جاقسى تۇسىنەمىز. وتان ءۇشىن، ادال، ابىرويلى قىزمەت ەتىپ جۇرگەنىمىزگە ءوزىمىزدى ماقتان تۇتامىز. ءدال وسى ءبولىم كومانديرلەرىنە دە العىسىمىز شەكسىز. ءبىزدى ناعىز ەر ازامات رەتىندە ءوسىرىپ، جاستارعا پاتريوتتىق تاربيەنىڭ ءدانىن سەۋىپ ىقپال ەتىپ كەلەدى. ءبىز ءوز وتامىزدىڭ پاتريوتىمىز!
قازاق ەرتە كەزدەن –اق، قاسىڭداعى سەرىگىڭە قاراپ سەنىڭ قانداي ادام ەكەنىڭدى باعالاعان. «دوسىڭدى كورسەت، مەن سەنىڭ كىم ەكەندىگىڭدى ايتامىن»،-دەگەن قاناتتى ءسوز وسىدان شىقسا كەرەك-ءتى. قاتارداعى ابىلاي ءدىناسىلوۆ پەن راحات ۋسماناليەۆ ەكەۋىنە قاراپ ءتانتى بولاسىڭ. ءبىر-ءبىرىنىڭ كەم- كەتىك جەرلەرىن تۇگەندەپ،تولىقتىرۋشى. راسىمەن، اسكەر ولاردىڭ دوستىق قارىم-قاتىناستارىن نىعايتا تۇسكەن. جاقىندارىنان جىراقتا جۇرگەن قوس سارباز بورىشتارىن وتەپ، تۋعان جەرگە بارعاننان سوڭ ۇلكەن جوسپارلار قۇرىپ قويعان. بولاشاقتا دا وتباسىلىق دوستار بولۋدى ارماندايدى ەكەن.
اياۋلىم ماديكانوۆا
