اسكەري قىزمەت – جاۋاپتى مىندەت! الدىمەن وتانعا دەگەن شەكسىز قۇرمەت! ءبىزدىڭ بۇگىنگى كەيىپكەرىمىز ماماندىعىن ماقتان تۇتاتىن باتالون كومانديرى پودپولكوۆنيك باعدات مامبەتوۆ.
اسكەري ادام بولۋ ونىڭ بالا كۇنگى ارمانى، قيالى بۇگىندە ابىرويلى قىزمەتى. باعدات مامبەتوۆ سىر ءوڭىرىنىڭ تۋماسى.1988 جىلى قىزىلوردا قالاسىندا دۇنيەگە كەلگەن. اكەسى مەحانيك، ال اناسى ۇلاعاتتى ۇستاز. اتا-انا تاربيەسىن كورىپ، بەرگەن ءبىلىمدى بويىنا سىڭىرە العان كەيىپكەرىمىز ءوزىنىڭ ۇلكەن ومىرىندە دە ايتۋلى جەتىستىكتەرگە جەتۋدە. تال بەسىكتەن العان تاربيە بيىك بەلەستەردى باعىندىرۋعا كومەگىن تيگىزىپ كەلەدى.
وتانعا ادال قىزمەت ەتۋ ءاربىر ازاماتتىڭ پارىزى. قاي زاماندا بولماسىن ەلدى جاۋدان ساقتاعان اتا-بابامىزدىڭ دا ۇستانىمى بۇل. ءدال وسى بورىشتى ادال وتەپ جۇرگەن پودپولكوۆنيك باعدات مامبەتوۆ اسكەري سالاداعى مەكتەبىن 2005 جىلدان باستاعان. بالالىق ارمانىن جۇزەگە اسىرۋ ماقساتىندا مەكتەپتى اياقتاي سالىسىمەن پەتروپاۆل جوعارى ۋچيليششەسىنە وقۋعا تۇسەدى. وندا ول ءتورت جىل ءبىلىم الىپ، 2009 جىلى وفيتسەر مامانداردىڭ ۇستاحاناسىنا اينالعان اسكەري وقۋ ورنى ينتستيتۋت بولىپ قايتا قۇرىلعان كەزدە وقۋىن ءتامامدايدى. العاشقى وفيتسەرلىك ەڭبەك جولىن وسكەمەن قالاسىندا ورنالاسقان 5518 اسكەري بولىمىنەن باستايدى. 2009-2018 جىلدار ارالىعىندا ۆزۆود كومانديرى، روتا كومانديرى، باتالوننىڭ شتاب باستىعى جانە اسكەري ءبولىم باسقارماسىندا اسكەر قىزمەتى جانە اسكەري قىزمەت قاۋىپسىزدىگىنىڭ باستىعى لاۋازىمىندا بولعان. ال 2018-2022 جىلدار ارالىعىندا قىزىلوردا قالاسىنداعى 5547 اسكەري بولىمىندە اسكەر قىزمەتى جانە اسكەري قىزمەت قاۋىپسىزدىگىنىڭ باستىعى بولدى. ودان كەيىن قىزمەت بابىمەن الىپ مەگاپوليسكە قونىس اۋدارادى. 2022 جىلى كەڭەس وداعىنىڭ باتىرى، گۆارديا پولكوۆنيگى، باۋىرجان مومىشۇلى اتىنداعى 5571 اسكەري ءبولىمىنىڭ 3 جەدەل ماقساتتاعى باتالون كومانديرى قىزمەتىنە تاعايىندالادى. سودان بەرى وسى قىزمەتتى ابىرويمەن اتقارىپ كەلەدى. قاراماعىندا 400-گە جۋىق اسكەري قىزمەتشى بار. تۇسىنە بىلگەن ادامعا باتالون كومانديرى بولۋ قينىننىڭ قيىنى. الدىمەن ۇلكەن جاۋاپكەرشىلىكتى، ەڭبەكتى، قاجىر-قايراتتى، ءتوزىمدى تالاپ ەتەدى. ماسەلەن، وتباسىندا اتا-اناسىنا، جارىنا، بالا-شاعاسىنا جاۋاپتى بولسا مۇندا ءاربىر اسكەري قىزمەتشىگە جاۋاپتى.
– ءوزىڭىز جوعارىدا ايتىپ وتكەندەي جالپى باتالون كومانديرى بولعاننان كەيىن ءبىزدىڭ جاۋاپكەرشىلىك وتە جوعارى. 400-دەن اسا ادامنان تۇراتىن جەكە قۇرامدى باسقارۋ دا وڭاي ەمەس. ءار ادامعا ەرەكشە قارىم- قاتىناس قالىپتاستىرۋمىز قاجەت. ماسەلەن، جاڭادان كەلگەن اسكەري قىزمەتشى بىردەن اسكەري ادام بولىپ كەلمەيدى. ءبىز ول ادامدى اسكەري ومىرگە بەيىمدەۋ ارقىلى، كۇندەلىكتى ءتارتىپ پەن جاۋىنگەرلىك قىزمەتتەردىڭ ارقاسىندا ويلاعان ناتيجەگە قول جەتكىزە الامىز. سونداي –اق، ءار سارباز دا ءبىر-ءبىر ءۇيدىڭ كەنجەسى، ەركەسى يا بولماسا جالعىزى بولىپ تابىلادى. مۇنداي كەزدە تارتىپكە ۇيرەنگەنشە جۇيەلى تۇردە جەكە-جەكە جۇمىس جاسايمىز.
بۇل دا ءبىزدىڭ كاسىبي شەبەرلىگىمىزدىڭ ءبىر كورىنىسى بولماق. ەڭ باستىسى كەۋدەدەگى وتانعا دەگەن پاتريوتتىق سەزىمىن ارتتىرۋ. باۋىرجان مومىشۇلى ايتپاقشى «تارتىپكە باعىنعان قۇل بولمايدى». مەنىڭ تاڭداعان بۇل ماماندىعىم قازىرگى كۇنى ماقتانىشىما اينالدى. كۇندەلىكتى ءتارتىپ پەن تالاپتىڭ ارقاسىندا ءوزىمنىڭ وتباسىلىق ينستيتۋتىمدى دا جاقسى قالىپتاستىرىپ كەلەمىن. وتانىما، وتباسىما ادال قىزمەت ەتىپ جۇرگەنىمدى ماقتان تۇتامىن، - دەيدى پودپولكوۆنيك باعدات مامبەتوۆ.
ءيا، باعدات مامبەتوۆتىڭ ماماندىعىنا دەگەن ادالدىعىن، ەرەكشە قۇرمەتىن بايقادىق. بۇل قىزمەت قاتەلىكتى كەشىرمەيدى. بەلگىلەنگەن اسكەري جارعى بويىنشا قاتاڭ تالاپتار قويىلادى، سوعان جەكە قۇرام باعىنادى. اسكەري سالادا ءوز الدىنا قيىندىقتارى كەزدەسسە دە سىر بىلدىرمەي ادال قىزمەتىن اتقارىپ ءجۇر.
ەڭبەك قانا ءبارىن جەڭبەك. ءدال وسى ۇستانىمدى ۇستاناتىن كەيىپكەرىمىز جاس جاۋىنگەرلەرگە دە وسى پرينتسيپپەن ءومىر ءسۇرۋ كەرەكتىگىن ايتادى. اسكەري ءومىردىڭ از عانا اۋىرتپاشىلىعىنا شىداس بەرىپ ادال قىزمەت ەتسە كەيىن زەينەتىن كورەتىنىنە كامىل سەنىمدى. ءار كەز شىنشىل، باتىل، باتىر بولۋعا كەڭەس بەرەدى. سول كەزدە عانا ومىردە بەلگىلەنگەن مارەگە قول جەتكىزۋگە بولادى دەيدى باتالون كومانديرى باعدات مامبەتوۆ.
اياۋلىم ماديكانوۆا
