قىزىلوردا وبلىسى قوعامدىق دامۋ باسقارما باسشىسى لاۋازىمىنا جاڭا كادر تاعايىندالدى، دەپ حابارلايدى “ادىرنا” ۇلتتىق پورتالى.
باسقارما باسشىلىعىنا كايۋپوۆ رۋسلان مۇحامەدالىۇلى تاعايىندالدى.
بۇگىن وبلىس اكىمى نۇرلىبەك نالىباەۆتىڭ توراعالىعىمەن وتكەن اكتيۆ وتىرىسىندا وڭىردەگى كادرلىق وزگەرىستەر تانىستىرىلعان.
وبلىستىق قوعامدىق دامۋ باسقارماسىنىڭ باسشىسى قىزمەتىن اتقارىپ كەلگەن ەسماحانوۆ الماسبەك ابىلقاسىمۇلى «AMANAT» پارتياسى وبلىستىق فيليالىنىڭ توراعاسى لاۋازىمىنا سايلاندى.
ايماق باسشىسى دامۋ باسقارماسىنىڭ باسشىلىعىنا كەلگەن رۋسلان كايۋپوۆكا ساتتىلىك تىلەدى.
«رۋسلان مۇحامەدالىۇلى – تۋعان جەردىڭ ازاماتى رەتىندە ايماقتىڭ قوعامدىق-ساياسي احۋالىمەن ەتەنە تانىس. ءتۇرلى جاۋاپتى قىزمەتتەردە تاجىريبەسى تولىسقان، قىزمەت باسپالداعىمەن ساتىلاپ وسكەن بىلىكتى كادر، جاۋاپتى مامان. شىن مانىندە، وڭىردەگى قوعامدىق-ساياسي احۋالدىڭ تۇراقتىلىعىن قامتاماسىز ەتۋدە قوعامدىق دامۋ باسقارماسىنىڭ ورنى ەرەكشە جانە جاۋاپكەرشىلىگى جوعارى. بۇگىندە ىشكى ساياسي تۇراقتىلىق ايرىقشا ماڭىزعا يە. رۋسلان مۇحامەدالىۇلى جاڭا قىزمەتتە وڭىردەگى قوعامدىق-ساياسي احۋالعا جۇيەلى مونيتورينگ جۇرگىزىپ، الەۋمەتتىك شيەلەنىستەردى بولدىرماۋعا، الەۋمەتتىك-ەكونوميكالىق تالداۋدى جاڭا قارقىندا دامىتۋعا جۇمىس جاسايتىن بولادى. ساياسي پارتيالارمەن جانە قوعامدىق بىرلەستىكتەرمەن، جاستار، ارداگەرلەر جانە كاسىپوداق ۇيىمدارىمەن ءوزارا ءىس-قيمىل ورناتىپ، قوعام تۇراقتىلىعى مەن حالىق سەنىمىن ساقتاۋ جولىندا جاۋاپتى جۇمىستاردى جوعارى دەڭگەيدە اتقاراتىنىنا سەنىم ارتامىز»، – دەدى نۇرلىبەك ماشبەكۇلى.
جاڭادان سايلانعان رۋسلان مۇحامەدالىۇلى 1984 جىلى قىزىلوردا وبلىسى شيەلى اۋدانىندا دۇنيەگە كەلگەن. جوعارى ءبىلىمدى، «ەكونوميكا» ماماندىعى بويىنشا ءبىلىم العان. قورقىت اتا اتىنداعى قىزىلوردا مەملەكەتتىك ۋنيۆەرسيتەتىنىڭ «مەملەكەتتىك جانە جەرگىلىكتى باسقارۋ» ماماندىعى بويىنشا «ەكونوميكا جانە بيزنەس» ماگيسترى. قازاقستان رەسپۋبليكاسى پرەزيدەنتى جانىنداعى مەملەكەتتىك باسقارۋ اكادەمياسىنىڭ تۇلەگى، «مەملەكەتتىك ساياسات» ءبىلىم بەرۋ باعدارلاماسى بويىنشا «بيزنەس جانە باسقارۋ» ماگيسترى.
قوعامدىق دامۋ باسقارماسىنىڭ باسشىلىعىنا كەلگەن رۋسلان مۇحامەدالىۇلىنا “ادىرنا” ۇجىمىنىڭ اتىنان ساتتىلىك تىلەيمىز! جاڭا قىزمەت قۇتتى بولسىن!
