قىزىلوردا وبلىسىندا قازالى اۋداندىق سوتىنىڭ توراعاسى داۋرەن ابدىقالىقوۆ سىبايلاس جەمقورلىق جاسادى دەگەن كۇدىكپەن ۇستالدى، دەپ حابارلايدى "ادىرنا" ۇلتتىق پورتالى ميحايل كوزاچكوۆ Telegram-پاراقشاسىنا سىلتەپ.
الدىن الا مالىمەتتەرگە سايكەس، قىزىلوردا وبلىسى بويىنشا ۇلتتىق قاۋىپسىزدىك كوميتەتىنىڭ قىزمەتكەرلەرى سوت توراعاسىن ۇستاعان. تەرگەۋ بارىسىندا كۇدىكتىگە قاتىستى ءىستىڭ پارا الۋ نەمەسە الاياقتىق فاكتىسى بويىنشا قوزعالعانى انىقتالىپ جاتىر.
تەرگەۋ نۇسقاسىنا سايكەس، 2024 جىلى الاياقتىق قىلمىسى ءۇشىن سوتتالعان ازاماتتىڭ تۋىستارى جازانى جەڭىلدەتۋ ماقساتىندا داۋرەن ابدىقالىقوۆقا 6 ميلليون تەڭگە كولەمىندە پارا بەرگەن. ناتيجەسىندە سوتتالۋشى شارتتى جازا العان. كەيىنىرەك ول مەرزىمىنەن بۇرىن بوساتىلۋ ءۇشىن تاعى 300 مىڭ تەڭگە جولداعانى ايتىلىپ وتىر.
سونىمەن قاتار ۇلتتىق قاۋىپسىزدىك كوميتەتى قازالى اۋداندىق سوتىنىڭ سۋدياسى سەرىك بەرتايعا قاتىستى دا تەرگەۋ جۇرگىزۋدى جوسپارلاپ وتىر. الايدا ول قازىرگى ۋاقىتتا اۋرۋحانادا ەم قابىلداپ جاتقاندىقتان، ازىرگە ۇستالماعان.
قۇقىق قورعاۋ ورگاندارى اتالعان ىسكە قاتىستى تەرگەۋ امالدارىن جالعاستىرىپ جاتىر. وزگە مالىمەتتەر تەرگەۋ مۇددەسىنە بايلانىستى جاريالانبايدى.
