27 جاستاعى قىزدى ءوز كابينەتىندە زورلادى دەپ ايىپتالعان تالدىقورعان پوليتسياسىنىڭ بۇرىنعى باسشىسى مارات كۇشتىباەۆ ۇكىمگە شاعىم ءتۇسىردى، - دەپ حابارلايدى “ادىرنا” ۇلتتىق پورتالى.
جەتىسۋ وبلىستىق سوتىنىڭ ءباسپاسوز قىزمەتىنىڭ حابارلاۋىنشا، سوتتالعان ازاماتتىڭ ۇكىمگە قارسى ارىزى بۇگىن، 17 شىلدەدە كەلىپ تۇسكەن. ءىستىڭ اپەللياتسيالىق سوتتا قاشان قارالاتىنى ايتىلمايدى.
ەسكە سالايىق، 2023 جىلدىڭ قاراشاسىندا تالدىقورعان پوليتسياسىنىڭ باستىعى مارات كۇشتىباەۆ 27 جاستاعى ايەلدى زورلادى دەگەن كۇدىكپەن ۇستالعان بولاتىن. كەيىن جابىرلەنۋشىنىڭ ادۆوكاتى وقيعانىڭ ءمان-جايىن ايتىپ بەردى. ونىڭ ايتۋىنشا، 2023 جىلدىڭ 12 قاراشاسىندا تالدىقورعاندىق ايەل قوعامدىق ءتارتىپتى بۇزدى دەگەن ايىپپەن ىشكى ىستەر بولىمىنە جەتكىزىلىپ، كەيىن ول باستىقتىڭ كابينەتىندە زورلانعان.
وسى جىلدىڭ ءساۋىر ايىنىڭ سوڭىندا سوت ۇكىمى بويىنشا كۇشتىباەۆ كىنالى دەپ تانىلىپ، قىلمىستىق كودەكستىڭ 120-بابى 2-بولىگىنىڭ 5-تارماعى بويىنشا 11 جىلعا باس بوستاندىعىنان ايىرىلدى. ول سونداي-اق ماراپاتتارىنان جانە «پوليتسيا پولكوۆنيگى» ارنايى اتاعىنان ايىرىلدى.
