جامبىل وبلىسىنىڭ سارىسۋ اۋدانىندا قاتتى جاۋىن-شاشىن سالدارىنان سۋ باسۋىنا بايلانىستى ماتەريالدىق شىعىندى زەردەلەۋ بويىنشا جۇمىستار جۇرگىزىلىپ جاتىر. بۇل تۋرالى جامبىل وبلىسى اكىمدىگىنىڭ ءباسپاسوز قىزمەتىنەن ءمالىم ەتتى، دەپ حابارلايدى “ادىرنا” ۇلتتىق پورتالى.
ايتا كەتسەك، 7 شىلدە كۇنى سارىسۋ اۋدانى اۋماعىندا قاتتى جاۋىن-شاشىن سالدارىنان كولبەۋ اعىن قالىپتاسىپ، بىرقاتار كوشەدەگى 400-دەن استام ءۇيدىڭ اۋلاسى، 47 ءۇيدىڭ ءىشى مەن 1 مەكتەپتىڭ جەرتولەسىن سۋ الدى.
سارىسۋ اۋدانىندا توتەنشە جاعداي سالدارىنان بولعان ءمان-جايلارعا بايلانىستى ماتەريالدىق شىعىندى زەردەلەۋ بويىنشا جۇمىسشى توپ قۇرىلدى.
«قازىر توتەنشە جاعدايلار دەپارتامەنتىنىڭ قىزمەتكەرلەرى سۋ سورۋ جۇمىستارىن جالعاستىرۋدا. ساعات 18:30-داعى جاعداي بويىنشا 18 600 م3 سۋ سورىلدى. جالپى 128 اۋلا مەن 47 ءۇيدىڭ ءىشى سۋدان تازارتىلدى. جاڭاتاس قالاسىنداعى ەكى ەلدى مەكەن (مالوەتاجكا، دەگەرەس) جارىققا قوسىلدى. تەك د. قوناەۆ ورتا مەكتەبىندە سۋدان تازارتۋ جۇمىستارىنىڭ جۇرگىزىلۋىنە بايلانىستى جارىق ءالى بەرىلمەدى. توتەنشە جاعداي سالدارىنان بولعان ماتەريالدىق شىعىندى زەردەلەۋ بويىنشا جۇمىسشى توپ قۇرىلىپ، جۇمىس جۇرگىزىپ جاتىر»، - دەپ حابارلادى وبلىس اكىمدىگىنەن.
بۇگىن، 8 شىلدە، تاڭەرتەڭ ۇشقىزسىز ۇشۋ اپپاراتىنىڭ كومەگىمەن سۋ دەڭگەيىنىڭ ەداۋىر تومەندەگەنى انىقتالدى. ادام، مال شىعىنى جوق.
زارداپ شەككەن تۇرعىندار ءۇشىن 105 ورىندىق ەكى قابىلداۋ پۋنكتى دايىندىققا كەلتىرىلىپ، وعان 12 ادام ورنالىستىرىلدى. قازىر ولار ءوز ەرىكتەرىمەن ۇيلەرىنە قايتارىلدى.
«جاڭاتاس–ساۋداكەنت» تاس جولى اشىق.
توتەنشە جاعدايدى جويۋعا ازاماتتىق قورعاۋ قىزمەتتەرىنەن 282 ادام، 64 تەحنيكا، 35 موتوپومپا جانە 1 ۇشقىزسىز ۇشۋ اپپاراتى جۇمىلدىرىلعان.
ايتا كەتەيىك، جامبىل وبلىسىنىڭ اكىمى ەربول قاراشوكەەۆ كەشە تۇندە سارىسۋ اۋدانى جاڭاتاس قالاسىنا بارىپ، سۋ العان اۋلالاردى ارالاپ كورىپ، احۋالمەن تانىستى.
اۋدانداعى احۋال ايماق باسشىسىنىڭ باقىلاۋىندا.
