شەت اۋدانىندا تالدى تاريحي-ارحەولوگيالىق پاركىندە تەمىر قانجار تابىلدى، دەپ حابارلايدى "ادىرنا" ۇلتتىق پورتالى قازاقپاراتقا سىلتەمە جاساپ.
قاراعاندىلىق عالىمدار مەن بوكەتوۆ اتىنداعى قارۋ 120-دان استام ستۋدەنتى ساق داۋىرىنە تيەسىلى قورعانداردى زەرتتەپ، تەمىر قانجار جانە راسىمدەرگە ارنالعان ىدىستاردى تاپتى.
قازىر بايقاسقا قورىمىندا ءۇش قورعان زەرتتەلدى.
"بۇل وتە قىزىقتى، ويتكەنى تەمىر توپىراقتا قالىپ قويسا، ناشار ساقتالادى. بۇل جەردە جاعداي وڭتايلى بولعان سياقتى. بۇل قانجار — سكيف-ساق ترياداسىنا كىرەتىن پىشاق قارۋى. ءبىزدىڭ داۋىرىمىزگە دەيىنگى III–II عاسىرلارداعى قانجار، ساق داۋىرىنەن عۇن-سارمات كەزەڭىنە ءوتۋ ۋاقىتىنا جاتادى. اكيناكتىڭ ىڭعايلى تۇتقاسى، ءتۇزۋ كرەست، قيسىق شىڭى جانە قان اعىزاتىن ويىعى بار،— دەپ تۇسىندىرەدى «ارحەولوگيالىق زەرتتەۋلەر» جشس ديرەكتورى ەرلان ءامىروۆ.
ەرلان ءامىروۆتىڭ ايتۋىنشا، زەرتتەۋ ناتيجەسىندە شاعىن، ورتا جانە ۇلكەن قورعاندار تابىلعان. انىقتالعان قورعانداردىڭ بيىكتىگى قايتىس بولعان ادامنىڭ ماتەريالدىق بايلىعىن نەمەسە الەۋمەتتىك مارتەبەسىن بىلدىرەدى دەپ بولجانىپ وتىر.
الداعى ۋاقىتتا ارحەولوگتار اقكەزەن قورىمىندا جالعاسى بار قورىمدى زەرتتەۋدى جالعاستىرماق.
"تالدىدا عۇن — سارمات ءداۋىرىنىڭ ەسكەرتكىشتەرى (ب. ز. د. III عاسىردان ب. ز. د. III عاسىرعا دەيىن) ەجەلگى ساق قورعاندارىنا بايلانعان دەپ ەسەپتەيمىز. ءبىز بۇل گيپوتەزانى قازبا جۇمىستارى بارىسىندا جۇيەلى تۇردە راستايمىز. قوسالقى قورعانداردا جەرلەۋ سيرەك كەزدەسەدى. ءبىز قولا قازاندىق پەن تەمىر نايزا ۇشىن تاپتىق، — دەيدى ەرلان ءامىروۆ.
