قىتايدا ءومىر بويىنا سوتتالعان قازاق قىزىنىڭ جاعدايى تۋرالى ءسىم مالىمەت بەردى، دەپ حابارلايدى "ادىرنا" ۇلتتىق پورتالى قازاقپاراتقا سىلتەپ.
سىرتقى ىستەر مينيسترلىگىنىڭ رەسمي وكىلى ايبەك سمادياروۆ ۆەدومستۆونىڭ ءباسپاسوز ءماسليحاتىندا قىتايدا سوتتالعان قازاقستان ازاماتشاسى اقجارقىن تۇرلىباي تۋرالى ايتتى.
«سوڭعى 6-7 جىلدا الەۋمەتتىك جەلىدە نەشە ءتۇرلى اقپارات شىقتى. بىرەۋىن دە راستاعان جوقپىز. سوندىقتان وعان قاتىستى اقپاراتتى راستاي المايمىن. ەگەر قانداي دا ءبىر سۇراقتارىڭىز بولسا، باس پروكۋراتۋراعا حابارلاسساڭىز بولادى. ەكستراديتسياعا وسى مەملەكەتتىك ورگان جاۋاپ بەرەدى»، - دەدى ءسىم رەسمي وكىلى.
باق وكىلدەرى ءسىم-نەن اقجارقىن تۇرلىبايدىڭ سوڭعى رەت قاشان بايلانىسقا شىققان سۇرادى. بۇل سۇراققا ايبەك سمادياروۆ قىسقا جاۋاپ بەردى.
«ءبىز بايلانىستامىز، جاعدايى جاقسى»، - دەدى ول.
ەسكە سالا كەتەيىك، اقجارقىن تۇرلىباي — 2014 جىلى ناۋرىزدا ۇستالعان قازاقستان ازاماتى. وعان شەكارادان 4,5 كەلى ەسىرتكىنى الىپ وتپەك بولدى دەگەن ايىپ تاعىلدى. ول كەزدە وتانداسىمىز 20 جاستا بولعان ەدى. كەلەسى جىلى ماۋسىم ايىندا قىتاي سوتى قازاق قىزىن ءومىر بويىنا باس بوستاندىعىنان ايىردى. سوتتا اقجارقىن شەتەلدىك دوسى الداپ كەتكەنىن ايتىپ، كىناسىن مويىنداعان جوق. 2016 جىلى سوت شەشىمى جويىلىپ، ءىس قايتا قاراۋعا جىبەرىلگەن بولاتىن.
