Qytaıda ómir boıyna sottalǵan qazaq qyzynyń jaǵdaıy týraly SIM málimet berdi, dep habarlaıdy "Adyrna" ulttyq portaly QazAqparatqa siltep.
Syrtqy ister mınıstrliginiń resmı ókili Aıbek Smadııarov vedomstvonyń baspasóz máslıhatynda Qytaıda sottalǵan Qazaqstan azamatshasy Aqjarqyn Turlybaı týraly aıtty.
«Sońǵy 6-7 jylda áleýmettik jelide neshe túrli aqparat shyqty. Bireýin de rastaǵan joqpyz. Sondyqtan oǵan qatysty aqparatty rastaı almaımyn. Eger qandaı da bir suraqtaryńyz bolsa, Bas prokýratýraǵa habarlassańyz bolady. Ekstradıııaǵa osy memlekettik organ jaýap beredi», - dedi SIM resmı ókili.
BAQ ókilderi SIM-nen Aqjarqyn Turlybaıdyń sońǵy ret qashan baılanysqa shyqqan surady. Bul suraqqa Aıbek Smadııarov qysqa jaýap berdi.
«Biz baılanystamyz, jaǵdaıy jaqsy», - dedi ol.
Eske sala keteıik, Aqjarqyn Turlybaı — 2014 jyly naýryzda ustalǵan Qazaqstan azamaty. Oǵan shekaradan 4,5 keli esirtkini alyp ótpek boldy degen aıyp taǵyldy. Ol kezde otandasymyz 20 jasta bolǵan edi. Kelesi jyly maýsym aıynda Qytaı soty qazaq qyzyn ómir boıyna bas bostandyǵynan aıyrdy. Sotta Aqjarqyn sheteldik dosy aldap ketkenin aıtyp, kinásin moıyndaǵan joq. 2016 jyly sot sheshimi joıylyp, is qaıta qaraýǵa jiberilgen bolatyn.
