تارازدا كولىك كوشەنىڭ قاق ورتاسىندا قازىلعان جىلۋ ماگيسترالىنىڭ شۇڭقىرىنا ءتۇسىپ كەتتى. بۇل تۋرالى الەۋمەتتىك جەلىلەردە ۆيدەو تارادى، دەپ حابارلايدى “ادىرنا” ۇلتتىق پورتالى.
اقپارپتقا سايكەس، وقيعا جەكسەنبىدە تولە بي كوشەسىندە بولعان. مۇندا ماگيسترالدىق جىلۋ جەلىلەرىن قايتا جاڭعىرتۋ جۇمىستارى جۇرگىزىلىپ جاتىر. ۆيدەودا جول تالعامايتىن كولىكتىڭ جولدىڭ ءدال ورتاسىندا قازىلعان ۇلكەن شۇڭقىرعا ءتۇسىپ كەتكەنى كورسەتىلگەن. زارداپ شەككەندەر بار، سونىڭ ىشىندە بالالار بار.
ۆيدەودا جۇرگىزۋشىلەرگە قاۋىپ تۋرالى ەسكەرتەتىن بىردە-ءبىر بەلگى جوق ەكەنى ايتىلادى.
وقيعانىڭ ءمان-جايىن جامبىل وبلىستىق پوليتسيا دەپارتامەنتى ءتۇسىندىردى.
"16 ماۋسىمدا ساعات 17:50-دە تولە بي كوشەسىمەن اباي كوشەسى باعىتىندا Lexus RX300 كولىگىنىڭ جۇرگىزۋشىسى "3.1 كىرۋگە تىيىم سالىنادى", "1.23 جوندەۋ جۇمىستارى" جول بەلگىلەرىن ەلەمەي، جولدىڭ جابىق بولىگىنە ءوتىپ كەتكەن. ماگيسترالدىق قۇبىر جوندەلىپ جاتقان جولدا قورشالماعان شۇڭقىرعا ءتۇسىپ كەتكەن", - دەلىنگەن حابارلامادا.
اپات سالدارىنان جۇرگىزۋشى، ونىڭ ايەلى جانە كامەلەتكە تولماعان ەكى بالاسى زارداپ شەكتى. ولارعا مەديتسينالىق كومەك كورسەتىلدى. پوليتسەيلەر مەردىگەردىڭ ۇستىنەن قىلمىستىق ءىس قوزعادى. تەرگەۋگە دەيىنگى تەكسەرۋ جۇرگىزىلىپ جاتىر.
قالا اكىمشىلىگى مالىمەتىنشە، بۇعان دەيىن بۇل جولدىڭ جابىلاتىنى تۋرالى اقپارات الەۋمەتتىك جەلىلەر مەن باق-تا تاراتىلىپ، ارنايى جول بەلگىلەرى ورناتىلعان.
