قازاقستاننان تۋعانىن ىزدەگەن بەلگيالىق جانىبەكتىڭ اكەسى تابىلدى، دەپ حابارلايدى "ادىرنا" ۇلتتىق پورتالى.
شەتەلدىكتەر اسىراپ العان قازاق بالاسى ەۋروپادان تۋعان اناسىن ىزدەپ كەلدى. جۋرناليست قىمبات دوسجان جانىبەكتىڭ اناسى ەمەس، ازىرگە تۋعان اكەسى تابىلعانىن ايتتى. الايدا تۋىستارى دنق تاپسىرۋدان باس تارتقان.
"سوڭعى ۋاقىتتا ءبىز ءۇنسىز جۇرگەنىمىزگە قاراپ اشىلعان قىلمىستىق ءىستى توقتاتىپ تاستادى دەپ ويلاماڭىزدار. زەرتتەۋ جۇمىسى ءبىر ساتكە دە توقتاعان جوق. كەشە مەن ارقالىق قالاسىنىڭ پوليتسيا قىزمەتكەرى سايات يسلاموۆپەن بىرگە قاراعاندى قالاسىنا بارىپ كەلدىم. زەرتتەۋ بارىسىندا جانىبەكتىڭ اكەسى بولۋى مۇمكىن دەگەن ەر ادام انىقتالدى. وكىنىشتىسى، ول كىسى ومىردەن وتكەن بولىپ شىقتى. سوندىقتان مارقۇمنىڭ جاقىندارى مەن ەت جاقىن ادامدارىمەن سويلەسۋ ءۇشىن پوليتسيا قىزمەتكەرىنە ەرىپ، ءوزىم ارنايى بارعان ەدىم، بىراق تۋىستارى سوزىمىزگە، وتىنىشىمىزگە قۇلاق اسپادى. دنق تەستىنە قان تاپسىرۋدان باس تارتتى", - دەيدى قىمبات دوسجان.
ال رەداكتسياعا ءانونيمدى تۇردە جانىبەكتىڭ تۋعان اكەسىمەن بىرگە جۇمىس ىستەگەن ازامات حابارلاسقان كورىنەدى. ول مارقۇم ارىپتەسىنىڭ جانىبەكتىڭ تۋعان اكەسىنەن اۋماي قالعانىن ايتقان.
"بىزگە قوڭىراۋ شالعان انونيم مارقۇمنىڭ سويلەگەن ءسوزى، ءجۇرىس تۇرىسى جانىبەكتەن اۋمايتىن ەدى، ءبىز بىرنەشە جىل بىرگە جۇمىس ىستەدىك» دەدى. ءتىپتى، مارقۇمنىڭ جاس كەزىندەگى سۋرەتكە قاراپ، ءبىز دە جانىبەك بالامىزدى كورگەندەي بولدىق. امال قانشا، مارقۇمنىڭ تۋىستارى تاعى دا ويلانىپ، وڭ شەشىم قابىلدايدى دەپ كۇتەمىز. جانىبەك «ەگەر وسى اۋلەتتىڭ بالاسى بولىپ شىقسام، ولاردىڭ اقشاسىنا نەمەسە دۇنيە مۇلكىنە تالاسىم جوق دەپ قولحات بەرۋگە دايىن ەكەنىن ايتتى", - دەيدى قىمبات دوسجان.
الايدا جانىبەكتى شەتەلدىكتەرگە ساتقان ايەل ادامنىڭ ءىسى سوتقا جىبەرىلمەگەنى انىقتالدى. كەلىنشەك 2004 جىلى ارقالىقتاعى بالالار ۇيىندەگى بالانى بەلگيالىق ايەلگە ساۋدالاعان،
"جانىبەكتى اسىراپ العان اناسى ۆالەري 2004 جىلى ارقالىقتان بالا اسىراپ الاردا ءبىر ايەل كىسىگە 12 مىڭ دوللار بەرگەنىن ايتتى. ونى جانىبەككە بەرگەن سۇحباتىنان دا كوردىڭىزدەر. ول سۇحباتتىڭ تۇپنۇسقاسى ءبىزدىڭ قولىمىزدا. اقشا العان ايەلدىڭ كىم ەكەنىن، ونىڭ 2004 جىلدارى قايدا جۇمىس ىستەگەنىن، قازىر قايدا ىستەيتىنىنىڭ ءبارىن ءبىلىپ وتىرمىز. ءتىپتى، سوڭعى رەت 2020 جىلى ۆالەري ەكەۋىنىڭ حات الماسقانىن دا تاپتىق. ول حاتتا “جانىبەكتىڭ جاعدايى قالاي؟” دەپ سۇراعان. بىراق ءىس ءالى سوتقا جەتپەي تۇر. سوڭىنا دەيىن جەتكىزىپ، شىندىقتى اشامىز دەپ سەنەمىن", - دەيدى جۋرناليست.
