ولي ءماجىلىسى زاڭ شىعارۋ پالاتاسىنىڭ ءبىر توپ دەپۋتاتى وزبەك حالقىنا ءتىل تيگىزگەن شەتەل ازاماتتارىنىڭ ەلگە كىرۋىنە تىيىم سالاتىن زاڭ جوباسىن ازىرلەدى. بۇل تۋرالى پارلامەنتتىڭ تومەنگى پالاتاسىنىڭ ءباسپاسوز قىزمەتى ايتتى، دەپ حابارلايدى «ادىرنا» ءتىلشىسى.
دەپۋتاتتار «شەتەل ازاماتتارى مەن ازاماتتىعى جوق ادامداردىڭ وزبەكستان رەسپۋبليكاسىنداعى قۇقىقتىق جاعدايى تۋرالى» زاڭعا وزگەرىستەر مەن تولىقتىرۋلار ەنگىزۋ كەرەكتىگىن ايتتى.
«زاڭ جوباسى وزبەكستاننىڭ مەملەكەتتىك ەگەمەندىگىن، اۋماقتىق تۇتاستىعى مەن قاۋىپسىزدىگىن نىعايتۋعا، ەلدەگى مەملەكەتارالىق، ۇلتارالىق، كونفەسسياارالىق كەلىسىمدى قورعاۋعا جانە وزبەكستان حالقىنىڭ ار-نامىسى، قادىر-قاسيەتى مەن تاريحىنا قۇرمەتپەن قاراۋدى قامتاماسىز ەتۋگە باعىتتالعان»، - دەدى ولار.
بيلىككە ەل مەن ۇلتتى قورلاعان شەتەلدىكتەر ءۇشىن رەسپۋبليكاعا كىرۋگە، وندا بانكتىك شوتتار اشۋعا، جىلجىمايتىن مۇلىك ساتىپ الۋعا، مەملەكەتتىك مۇلىكتى جەكەشەلەندىرۋگە قاتىسۋعا، قارجىلىق جانە شارتتىق قاتىناستارعا تۇسۋگە بەسجىلدىق تىيىم سالۋ ۇسىنىلدى.
ەسكە سالايىق، 2021 جىلى وزبەكستاندا پرەزيدەنت تاراپىنا قورلاۋ نەمەسە جالا جابۋ دەرەگىنە قاتىستى قىلمىستىق جاۋاپكەرشىلىك ەنگىزىلدى. بۇعان دەيىن مەملەكەت باسشىسىن «بالاعاتتادى» دەگەن 10 ادامنىڭ سوتتالعانىن جازعان ەدىك.
