وزبەكستاننىڭ ساياسي ساحناسىندا ماڭىزدى كادرلىق اۋىس-تۇيىستەر ورىن الۋدا. بۇرىن پرەزيدەنت اكىمشىلىگىنىڭ باسشىسى بولعان زاينيلوبيددين نيزوميددينوۆ ەندى تاشكەنت وبلىسىنداعى بەكاباد اۋدانىنىڭ حوكيمى قىزمەتىنە كىرىستى، دەپ حابارلايدى "ادىرنا" ۇلتتىق پورتالى وبلىس اكىمشىلىگىنىڭ ءباسپاسوز قىزمەتىنە سىلتەپ.
اۋداننىڭ جاڭا باسشىسىن تانىستىرۋ ساتىندە تاشكەنت وبلىسىنىڭ اكىمى زوير ميرزاەۆ بەكابادتىڭ الەۋمەتتىك-ەكونوميكالىق كورسەتكىشتەرىنىڭ تومەندىگىن اشىق اتاپ ءوتتى. اۋدان قىزمەت كورسەتۋ كولەمى، بيۋدجەت كىرىستەرى جانە ينۆەستيتسيا تارتۋ بويىنشا وڭىردە سوڭعى ورىندا تۇر.
بۇعان دەيىن وسى قىزمەتتى اتقارعان شۋحرات دۋستبەكوۆ قىزمەتىنەن بوساتىلدى، ال نيزوميددينوۆتىڭ كانديداتۋراسى اۋداندىق حالىق دەپۋتاتتارى كەڭەسىنىڭ كەزەكتەن تىس سەسسياسىندا ماقۇلداندى.
نيزوميددينوۆ 2018 جىلدىڭ تامىزىنان 2022 جىلدىڭ شىلدەسىنە دەيىن وزبەكستان پرەزيدەنتى اكىمشىلىگىن باسقاردى. بۇعان دەيىن پرەزيدەنت شاۆكات ميرزيوەۆتىڭ پرەمەر-مينيستر كەزەڭىندەگى كومەكشىسى بولعان. 2022 جىلى دەنساۋلىق جاعدايىنا بايلانىستى باسقا جۇمىسقا اۋىسىپ، وزبەكستان كاسىپوداقتار فەدەراتسياسى توراعاسىنىڭ ءبىرىنشى ورىنباسارى بولىپ تاعايىندالدى. بۇل لاۋازىم سول ۋاقىتتا جاڭادان قۇرىلعان ەدى. 2023 جىلى پرەزيدەنت ميرزيوەۆ پرەزيدەنت اكىمشىلىگى باسشىسى قىزمەتىن مۇلدەم جويعان بولاتىن.
