2025 جىلى قازاقستاندا شەتەلدىك قاتىسۋى بار كومپانيالار مەن ولاردىڭ فيليالدارىنىڭ سانى 4,4 مىڭعا ارتتى. بۇل ءوسىم نەگىزىنەن قىتاي مەن وزبەكستاننان كەلگەن كاسىپكەرلەردىڭ بەلسەندىلىگىمەن بايلانىستى. مۇنداي مالىمەتتى ۇلتتىق ستاتيستيكا بيۋروسى (ۇسب) جاريالادى، دەپ حابارلايدى "ادىرنا".
ۇسب دەرەگىنشە، 2026 جىلعى 1 قاڭتارداعى جاعداي بويىنشا ەل اۋماعىندا شەتەلدىك قاتىسۋى بار 63,9 مىڭ زاڭدى تۇلعا مەن فيليال تىركەلگەن. بۇل قاتارعا بىرلەسكەن كاسىپورىندار عانا ەمەس، سونىمەن بىرگە شەتەلدىك كومپانيالاردىڭ قازاقستانداعى فيليالدارى دا كىرەدى.
قازاقستاندا بيزنەس اشقان نەمەسە بىرلەسكەن كاسىپورىن قۇرعان ەلدەردىڭ ىشىندە ءوسىم كورسەتكىشى بويىنشا قىتاي مەن وزبەكستان ايقىن كوش باستادى.
ماسەلەن، قىتايدىڭ قاتىسۋىمەن تىركەلگەن كومپانيالار سانى 2,8 مىڭعا ءوسىپ، جالپى سانى 8 مىڭعا جەتتى.
ال وزبەكستاننان كەلگەن كاسىپكەرلەردىڭ قاتىسۋىمەن قۇرىلعان كومپانيالار 2,5 مىڭعا كوبەيىپ، ولاردىڭ جالپى سانى 8,2 مىڭدى قۇرادى.
سونىمەن قاتار ازەربايجاننىڭ قاتىسۋى بار كومپانيالار سانى 102 ۇيىمعا ارتقان. قالعان ەلدەر بويىنشا ءوسىم 100-دەن تومەن دەڭگەيدە قالىپ وتىر.
قازاقستاندا شەتەلدىك كومپانيالار سانى بويىنشا ءبىرىنشى ورىندا تۇرعان رەسەي (جالپى سانى 23 مىڭ) 2025 جىلى كەرىسىنشە، تومەندەۋ كورسەتكەن. ءبىر جىل ىشىندە رەسەيمەن بايلانىستى كومپانيالار سانى 468-گە قىسقارعان.
سونداي-اق قىرعىزستان (–313) جانە تۇركيا (–209) كومپانيالارىنىڭ سانى دا ازايعانى بايقالادى.
قازاقستانداعى شەتەلدىك قاتىسۋى بار كاسىپورىنداردىڭ باسىم بولىگى شاعىن بيزنەسكە تيەسىلى. رەسمي ەسەپ بويىنشا ولاردىڭ سانى 63,4 مىڭ.
ال ورتا كاسىپورىندار – 359,ء ىرى كومپانيالار – 222 عانا.
بۇل كورسەتكىش شەتەلدىك كاپيتالدىڭ كوپ بولىگى ەلگە ءىرى ءوندىرىس تۇرىندە ەمەس، نەگىزىنەن شاعىن جانە ورتا بيزنەس باعىتىندا كەلىپ جاتقانىن بايقاتادى.
قاي سالادا شەتەلدىك بيزنەس كوپ؟
شەتەلدىك قاتىسۋى بار كومپانيالاردىڭ ەڭ كوپ بولىگى ساۋدا جانە اۆتوكولىك جوندەۋ سالاسىندا جۇمىس ىستەيدى. بۇل باعىتتا 23,5 مىڭ زاڭدى تۇلعا تىركەلگەن.
سونداي-اق شەتەلدىك بيزنەس ءجيى كەزدەسەتىن سالالاردىڭ قاتارىندا:
-
وزگە قىزمەت تۇرلەرىن كورسەتۋ – 10,1 مىڭ،
-
قۇرىلىس – 5,9 مىڭ،
-
عىلىمي جانە تەحنيكالىق قىزمەت – 4,3 مىڭ ۇيىم.
ايتا كەتەيىك، بۇعان دەيىن ۇلتتىق ستاتيستيكا بيۋروسى 2026 جىلعى 1 قاڭتاردا قازاقستاندا 2,36 ملن شاعىن جانە ورتا كاسىپكەرلىك سۋبەكتىسى تىركەلگەنىن مالىمدەگەن بولاتىن. بۇل كورسەتكىش تە ءوسىم كورسەتىپ، وتكەن جىلمەن سالىستىرعاندا 100 مىڭعا ارتقان.
ساراپشىلاردىڭ پىكىرىنشە، شەتەلدىك قاتىسۋى بار كاسىپورىندار سانىنىڭ ارتۋى ەل نارىعىنا دەگەن قىزىعۋشىلىقتىڭ ساقتالعانىن كورسەتەدى. الايدا كەيبىر ەلدەر بويىنشا كومپانيا سانىنىڭ قىسقارۋى سىرتقى ەكونوميكالىق جاعدايدىڭ دا اسەرىن ءبىلدىرۋى مۇمكىن.
