پروكۋراتۋرا جامبىل وبلىسىنىڭ بۇرىنعى اكىمى كارىم كوكىرەكباەۆقا قاتىستى اقتاۋ ۇكىمىنە شاعىم تۇسىرۋگە دايىندالۋدا، دەپ حابارلايدى “ادىرنا” ۇلتتىق پورتالى باس پروكۋراتۋرانىڭ ءباسپاسوز قىزمەتىنە سىلتەپ.
«2024 جىلعى 7 ماۋسىمدا الماتى وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتى القابيلەردىڭ قاتىسۋىمەن قازاقستان رەسپۋبليكاسى توتەنشە جاعدايلار مينيسترلىگى «قازسەلقورعاۋ» مەملەكەتتىك مەكەمەسىنىڭ بۇرىنعى باسشىسى ك.ن.كوكرەكباەۆقا قاتىستى اقتاۋ ۇكىمىن جاريالادى. وعان ءبىر توپ ادامداردان اسا ءىرى كولەمدە بىرنەشە رەت پارا الدى دەگەن ايىپ تاعىلدى. پروكۋراتۋرا بۇل سوت ۇكىمى بويىنشا ونىڭ كۇشىن جويۋ تۋرالى اپەللياتسيالىق شاعىم تۇسىرەدى»، - دەلىنگەن سەنبى كۇنى تاراتقان حابارلامادا.
جۋرناليست ميحايل كوزاچكوۆ ءبىر كۇن بۇرىن كوكىرەكباەۆتىڭ اقتالعانىن حابارلادى.
«بۇگىن الماتى وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا «انتيكور» قىزمەتكەرلەرى 2022 جىلدىڭ جەلتوقسانىندا تىنتۋدەن كەيىن 396 ميلليون تەڭگە كولەمىندە پارا الۋ ءىسى بويىنشا «قازسەلقورعاۋ» مەملەكەتتىك مەكەمەسىنىڭ باسشىسى كارىم كوكىرەكباەۆ پەن ونىڭ ورىنباسارى ادىلەت احاتاەۆقا قاتىستى ۇكىم شىققان بولاتىن. ولارمەن بىرگە پارا بەرۋشى «بازيس كونستراكشن ينفر» جشس ديرەكتورى اندرەي پوپلاۆسكي دە ۇستالدى. قىلمىستىق ءىس ماتەريالدارىنا سايكەس، ول اقشانى ونىڭ كومپانياسى “قازسەلقورعاۋدا” ونداعان ميلليارد تەڭگەنىڭ تەندەرلەرىن جەڭىپ العانى ءۇشىن تولەگەن»، — دەپ جازدى جۋرناليست ءوزىنىڭ Telegram-ارناسىندا.
ول ءىس 2023 جىلدىڭ شىلدەسىندە سوتقا جىبەرىلگەنىن جانە كوكىرەكباەۆتىڭ ءوتىنىشى بويىنشا سوت پروتسەسىنە القابيلەر قاتىسقانىن اتاپ ءوتتى.
«تەرگەۋ تەك «بازيس» وكىلى پوپلاۆسكي مەن «كازسەلقورعاۋ» باسشىسىنىڭ ورىنباسارى احاتاەۆتىڭ عانا كىناسىن دالەلدەي الدى دەگەن قورىتىندىعا كەلگەن. ەكەۋى دە 11 جىلعا باس بوستاندىعىنان ايىرىلدى. بىراق قازىلار القاسى كارىم كوكىرەكباەۆتى اقتادى. ۇكىم زاڭدى كۇشىنە ەنگەن جوق»، - دەپ ءتۇسىندىردى كوزاچكوۆ.
ەستەرىڭىزگە سالا كەتەيىك، بۇعان دەيىن ك.كوكىرەكباەۆتىڭ قىلمىستىق ىسىنە اقتاۋ ۇكىمى شىققانىن جازعان بولاتىنبىز.
