ماڭعىستاۋ وبلىسى بەينەۋ اۋدانىنداعى تۇلەكتەردىڭ اتا-انالارى 25 مامىر كۇنى ءتۇس اۋا بورانقۇل اۋىلىندا سوڭعى قوڭىراۋدان كەيىن بولعان جاپپاي توبەلەسكە بايلانىستى بىرنەشە ۆيدەوحابارلاما جولدادى، - دەپ حابارلايدى “ادىرنا” ۇلتتىق پورتالى.
اتا-انالار بالالارىنىڭ قىلىعى ءۇشىن قازاقستان حالقىنان كەشىرىم سۇرادى. تۇلەكتەردىڭ اكەلەرى مەن انالارى توبەلەس سالدارىنان ەشكىم زارداپ شەكپەدى دەپ سەندىردى. ولاردىڭ ايتۋىنشا، مۇعالىمدەر، مەكتەپ ديرەكتورى جانە پوليتسيا قىزمەتكەرلەرى ءتۇسىندىرۋ جۇمىستارىن جۇرگىزگەن. ەشقانداي شاعىمدار جوق.
تۇلەكتەردىڭ وزدەرى دە كەشىرىم سۇرادى. ولار توبەلەستىڭ قانداي دا ءبىر «كەلىسپەۋشىلىكتەن» تۋىنداعانىن ايتتى. سونداي-اق ولار اتا-انالاردان، مەكتەپ باسشىلىعىنان جانە مۇعالىمدەردەن كەشىرىم سۇرادى.
ەستەرىڭىزگە سالا كەتەيىك، سەنبى، 25 مامىر كۇنى ءتۇس اۋا ماڭعىستاۋ وبلىسى، بەينەۋ اۋدانى، بورانقۇل (بۇرىنعى وپورنىي) اۋىلىندا تۇلەكتەر اراسىندا جاپپاي توبەلەس بولعان ەدى. وقيعا ۆيدەوعا ءتۇسىپ قالىپ، الەۋمەتتىك جەلىدە جاريالانعان. كادردا بىرنەشە ونداعان ءجاسوسپىرىمنىڭ توبەلەسىپ جاتقانى، ولاردىڭ كەيبىرىنىڭ جينالعاندارعا تاس لاقتىرىپ جاتقانى كورىنەدى.
وبلىستىق پوليتسيا دەپارتامەنتى بۇزاقىلىققا قاتىستى قىلمىستىق ءىس قوزعالعانىن حابارلادى. كامەلەتكە تولماعان 47 ءجاسوسپىرىم پوليتسياعا جەتكىزىلدى.
