"اسا اۋىر قىلمىستى كۇنى بۇرىن ۋادەلەسپەي جاسىرىپ قالۋ" بابى بويىنشا 4 جىلعا سوتتالعان بايجانوۆتىڭ قورعاۋشىسى ۇكىممەن كەلىسپەيتىنىن ايتتى، دەپ حابارلايدى "ادىرنا" ۇلتتىق پورتالى Nege.kz-كە سىلتەپ.
13 مامىر كۇنى استانا قالاسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا بيشىمباەۆ پەن بايجانوۆقا قاتىستى قىلمىستىق ءىس بويىنشا ۇكىم جاريالاندى. بۇل ىستە كۇدىكتى دەپ تانىلعان باقىتجان بايجانوۆقا قك-ءنىڭ 432-بابى – اسا اۋىر قىلمىستى كۇنى بۇرىن ۋادەلەسپەي جاسىرىپ قالۋ بابى بويىنشا 4 جىل جازا تاعايىندالدى. ۇكىم وقىلعان سوڭ سوتتالۋشى بايجانوۆ بۇل شەشىممەن كەلىسپەيتىنىن ايتتى.
ادۆوكات عازيز ىنتىقباەۆ ءوزىنىڭ قورعاۋىنداعى بايجانوۆتىڭ بۇل ۇكىممەن كەلىسپەيتىنىن راستادى.
قورعاۋشىنىڭ ايتۋىنشا، بايجانوۆتىڭ ارەكەتىندە ەشقانداي دا قىلمىستىڭ قۇرامى جوق. بۇل تۋرالى دالەلدى ەگجەي-تەگجەيلى سوتقا دا ۇسىنعانىن اتاپ ءوتتى.
"قازىر عانا يزولياتورعا بارىپ، باقىتجان بايجانوۆپەن كەزدەسىپ كەلە جاتىرمىن. بىزدە اپەللياتسيالىق شاعىم تۇسىرۋگە 15 تاۋلىك ۋاقىت بار. كەلەسى اپتانىڭ اياعىنا دەيىن مىندەتتى تۇردە شاعىم بەرەمىز. ودان كەيىن استانا قالالىق سوتى قارايدى. سودان كەيىن عانا ۇكىم كۇشىنە ەنەدى", - دەيدى ول.
عازيز ىنتىقباەۆ بۇل ۇكىمدى بايجانوۆتىڭ اۋىر قابىلداعانىن ايتادى.
ء"وزىڭىز ويلاڭىزشى، جازىقسىز، ەشتەڭەنى بىلمەگەن ادامدى 4 جىلعا سوتتاپ جىبەردى. بۇل وقيعا بولىپ جاتقان 8 قاراشادان 9-ىنا قاراعان كۇنى بايجانوۆ بالا-شاعاسىمەن ۇيىندە جاتقان ادام. ءوزى ىشپەيدى، ناماز وقيتىن جىگىت. ول سول كەزدە «تاڭەرتەڭ جۇمىسقا بارامىن، كەشكە قاراي قولىما كىسەن سالىپ، 4 جىلعا سوتتاپ جىبەرەدى» دەگەن وي باسىنا كىرىپ تە شىققان جوق. سوت پروتسەسى باستالماي تۇرىپ-اق ءبارىن باقىتجاننان بۇگە-شىگەسىنە دەيىن سۇرادىم. «تاڭەرتەڭنەن كەشكە دەيىن حرونولوگياسىن جازىپ شىق» دەدىم. ءوز باسىم بايجانوۆقا 100 پايىز سەنەمىن", - دەدى ادۆوكات.
ايتا كەتەيىك، ايەلىن ولتىرگەن قۋاندىق بيشىمباەۆ 24 جىلعا سوتتالسا، قىلمىس تۋرالى دەر كەزىندە حابارلاماعان دەگەن ايىپپەن بايجانوۆ 4 جىلعا باس بوستاندىعىنان ايىرىلدى. ۇيلەستىرۋشى-سۋديا الما ەسىموۆا بيشىمباەۆتىڭ شارتتى تۇردە مەرزىمىنەن بۇرىن بوساتۋ تۋرالى ءوتىنىشتى تەك 2040 جىلى بەرە الاتىنىن ايتتى.
