يراندىق رەجيسسەر سوت ۇكىمىنەن كەيىن ەلدەن قاشىپ كەتكەن، دەپ حابارلايدى "ادىرنا" ۇلتتىق پورتالى فەرعانا اگەنتتىگىنە سىلتەپ.
بەرلين كينوفەستيۆالىنىڭ جەڭىمپازى، يراندىق رەجيسسەر موحامماد راسۋلوف سەگىز جىلعا باس بوستاندىعىنان ايىرىلعان بولاتىن. سوت ۇكىمى شىققاننان كەيىن رەجيسسەر جاسىرىن تۇردە وتانىنان كەتىپ قالعان. راسۋلوف ەلدەن كەتۋ تۋرالى الەۋمەتتىك جەلىدە جازدى.
يراندىق ەلىن تاستاپ كەتۋ يدەياسى ءوزىن قاماۋعا الۋ تۋرالى ۇكىم شىققاندا پايدا بولعانىن جازادى.
«شەشىم قابىلداۋعا كوپ ۋاقىتىم بولمادى. ماعان تۇرمە مەن يراننان كەتۋدىڭ ءبىرىن تاڭداۋ كەرەك بولدى. مەن قۋعىندى تاڭدادىم. 2017 جىلدىڭ قىركۇيەگىندە يسلام رەسپۋبليكاسى مەنىڭ تولقۇجاتىمدى تارتىپ الدى. سوندىقتان يراننان جاسىرىن كەتۋگە تۋرا كەلدى»، - دەپ ءتۇسىندىردى رەجيسسەر.
راسۋلوف ءوز مىسالىندا تەمىر توردىڭ ار جاعىندا ءولىم جازاسىن كۇتىپ وتىرعان جاس رەپەر تۋماج سالەحيدىڭ وقيعاسىن دا اتاپ ءوتتى.
«رەپرەسسيانىڭ اۋقىمى مەن قارقىندىلىعى قاتىگەزدىك دەڭگەيىنە جەتتى، ادامدار كۇن سايىن ۇكىمەتتىڭ كەلەسى اۋىر قىلمىسى تۋرالى جاڭالىقتى كۇتەدى»، - دەپ جازدى راسۋلوف.
ەسكە سالا كەتەيىك، رەجيسسەرعا قاتىستى ۇكىم وتكەن اپتادا شىققان بولاتىن. ول «قاسيەتتى ءىنجىر تۇقىمى» دەگەن سوڭعى جۇمىسى ءۇشىن جازالانعان بولۋى مۇمكىن. سەبەبى باق مالىمەتىنشە، فيلم ءتۇسىرۋ توبىنىڭ قاماۋعا الىنعانى انىقتالعان.
