اقتوبەدەگى تۇرعىن ءۇي كەشەنى مەن قۇرىلىس كومپانياسىنىڭ اتىنا شاعىم ءتۇستى، دەپ حابارلايدى "ادىرنا" ۇلتتىق پورتالى.
اقتوبەدە "قازىنا پرەميۋم" تۇرعىن ءۇي كەشەنىنىڭ تۇرعىندارى پاتەر كىلتىن الا الماي ءجۇر. سەبەبى 2022 جىلى قۇرىلىسى اياقتالۋ كەرەك بولعان پاتەردىڭ قابىرعاسى قالانىپ، جۇمىس توقتاعان.
اوتوبە قالاسى باتىس 2 شاعىن اۋدانىندا باستالعان قۇرىلىسقا جاۋاپتى مەكەمە - "جاستار قۇرىلىس" جشس. نىسان تولقۇجاتىندا ءۇيدىڭ قۇرىلىسى 2021 جىلدىڭ ءساۋىر ايىندا باستالعانى جازىلعان. جوسپار بويىنشا عيمارات 2022 جىلدىڭ جەلتوقسان ايىندا ءبىتۋى كەرەك ەدى. الايدا باسپانالى بولۋعا ءۇمىتتى ازاماتتار دايىن پاتەردەن ەمەس، تەك ءتورت قابىرعاسى قالانىپ، قۇرىلىسى بىتپەگەن الاڭننان سويلەپ تۇر. اشىنعان حالىق پرەزيدەنت، پرەمەر-مينيستر، ءماجىلىس توراعاسىنان كومەك سۇراپ، بەينە ۇندەۋ جازدى.
"مەنىڭ ۇندەۋىمنىڭ سەبەبى "قازىنا پرەميۋم" تۇرعىن ءۇي كەشەنى، "جاستار قۇرىلىس" جشس باسشىسى تورەحانوۆا ساۋلە جارىلقاعانقىزى 2021 جىلى بىزدەن قاراجاتىمىزدى جيناپ الىپ، ء"ۇي سالىپ بەرەمىز" دەگەن. ءۇيدىڭ ءبىتۋ مەرزىمى 2022 جىلدىڭ سوڭعى توقسانى دەگەن بولاتىن. سودان بەرى وسى 105 پاتەرلى تۇرعىن ءۇي كەشەنىندە حالىقتان جينالعان قاراجاتتىڭ كولەمى 1,5 ملرد تەڭگە. قازىر 2024 جىل بولدى. دەگەنمەن ءۇيدىڭ بىتەتىن ءتۇرى جوق. ءبىز وبلىس اكىمدىگىنە، قالا اكىمدىگىنە، وبلىستىڭ قۇرىلىس باسقارماسىنا، جەرگىلىكتى قۇزىرلى ورگاندارعا ارىز-شاعىم تۇسىردىك. ءبىزدىڭ ارىز-شاعىم اياق-استى نەگىزسىز، ەش قاراۋسىز قالىپ كەتۋدە. وعان جاۋاپ تا بەرىلمەيدى. بۇعان نە سەبەپ ەكەنىن بىلمەيمىز!" - دەيدى اقتوبەلىك مارات احمەتوۆ.
ازاماتتاردىڭ سوزىنشە، قۇرىلىستى اياقتاپ، "پاتەر بەرەمىن" دەگەن ازاماتشانىڭ قالادا بىرنەشە بيزنەسى بار. باسپانالى بولامىز دەگەن جۇرتتىڭ باستى ارمانى - عيماراتتىڭ قۇرىلىسى جىلدام جالعاسىپ، دايىن پاتەرگە تەزىرەك كىرۋ.
"مەن سەكىلدى سوڭعى قاراجاتىن سالىپ، بالا-شاعاسىمەن پاتەر جاعالاپ، ايلىعىن پاتەرگە بەرىپ، تۇرمىس كەشىپ وتىرعاندار جەتەرلىك. ساۋلە حانىم ءۇيدى ءبىتىرىپ بەرەمىن دەسە ونىڭ تولىق مۇمكىندىگى بار. ول 1,5 ملرد قاراجاتقا قالانىڭ ورتالىعىنان ءدال وسىنداي تۇرعىن ءۇي كەشەنىن سالىپ بەرەمىن دەپ 300 ملن تەڭگەگە جەر ساتىپ العانى بەلگىلى. ونىڭ اتىندا "الماس" ساۋدا ءۇيى بار. ودان بولەك، قالاداعى 12 مولتەك اۋدانىندا حالىققا قىزمەت كورسەتىپ وتىرعان مەيرامحاناسى بار. وسىلاردى ساتسا دا حالىقتىڭ جان-ايقايىن تىڭداپ، ءۇيدى ءبىتىرىپ بەرەر مۇمكىندىگى بار. ونى ىستەمەي وتىر", - دەيدى ۇندەۋ جاساعان ازامات.
اقتوبەلىكتەر "پاتەر بەرەمىن" دەپ سان سوقتىراتىن الاياقتارعا قارسى قۇرىلىس سالاسىنا قاتىستى زاڭعا تولىقتىرۋلار مەن وزگەرتۋلەر ەنگىزۋدى سۇرايدى. ولاردىڭ سوزىنشە اتالعان تۇرعىن ءۇي كەشىنىڭ باسشىسىنا 105 ادام اقشا بەرىپ، باسپاناعا قول جەتكىزە الماي ءجۇر.
