“قازاقفيلم” انيماتورلارىنا قالعان 84 ميلليون تەڭگە نەگە تولەنگەن جوق؟ بۇل تۋرالى ۇلتتىق كينونى قولداۋ ورتالىعىنىڭ باسقارما توراعاسى قۇرمانبەك جۇماعالي ايتىپ بەردى، دەپ حابارلايدى “ادىرنا” ۇلتتىق پورتالى.
توراعانىڭ Facebook پاراقشاسىنا جازعان جازباسى بويىنشا، “قازاقفيلم” انيماتورلارى“التىن ادام” انيماتسيالىق ءفيلمىن تولىق اياقتاماعان.
“قازاقفيلم” انيماتورلارى“التىن ادام” انيماتسيالىق فيلمىنە قاتىستى ماسەلە كوتەرگەنىن بىلەسىزدەر. بۇل جاعدايدىڭ شيەلەنىسۋىنىڭ ناقتى سەبەبىن بىلۋلەرىڭىز ءتيىس دەپ ەسەپتەيمىن. جوبا ۇلتتىق كينو ورتالىعىنا 2020 جىلى ۇسىنىلىپ، باستالعان. جالپى قۇنى 378 ملن تەڭگەنى قۇرايدى. كەلىسىمشارت بويىنشا كينوجوبا 2021 جىلى اياقتالۋى ءتيىس بولاتىن. بىراق ورىنداۋشى جۇمىستى تولىق اياقتاماي، ءفيلمدى وتكىزبەدى.
2022 جىلى “قازاقفيلم” جوبانى قايتا تاپسىرا المادى. 2023 جىلعا سوزىلعان جوبادا سوڭعى تۇزەتۋلەر قامتىلماعان بولىپ شىقتى. ورتالىق ۇجىمنىڭ 3 جىل بويى جوبانى اياقتاي الماي كەلە جاتقان سەبەپتەرىنە تۇسىنىستىكپەن قاراپ، ءتيىستى اتقارعان جۇمىستارىنا قاراجات تولەنىپ كەلدى. ورىنداۋشىعا اتقارعان جۇمىسى ءۇشىن 294 ملن تەڭگە تولەندى”، دەپ جازدى ول.
سونداي-اق، ول انيماتورلارعا تولەنۋ كەرەك قالعان 84 ملن قارجى قايدا كەتكەنىن ايتتى.
“ال قالعان 84 ملن نەگە تولەنگەن جوق؟ سەبەبى، 2023 جىلدىڭ سوڭىندا جوبا تولىق اياقتالۋى كەرەك ەدى. الايدا ۇجىم جىل سوڭىندا تاعى شيكى جوبانى تاپسىردى. ساراپتاما كەڭەسى جوباعا قاتىستى 126 ەسكەرتۋ ەنگىزگەن. بىراق بۇل تۇيتكىلدى تۇستار جوعارىدا ايتقانىمداي، ۋاقىتىلى تۇزەتىلمەگەن بولىپ شىقتى. ماسەلە جىلدارعا سوزىلدى، سوندىقتان ۇلتتىق كينونى قولداۋ ورتالىعى مەن «قازاقفيلم» اراسىنداعى ءىس سوتقا جەتتى. ال اياقتالماعان جوباعا مەملەكەت قارجى بولە المايدى. وسىعان بايلانىستى قالعان 84 ملن تەڭگە كارجى بيۋدجەت قازىناسىنا قايتارىلدى.
تاعى ءبىر ەسكەرەتىن دۇنيە، وسىدان ءبىر اي بۇرىن "قازاقفيلم" تىزگىنىندەگى ارىپتەسىم ازامات ساتىبالدىمەن بىرگە سوت شەشىمىن ورىنداۋ جونىندەگى مەدياتيۆتى كەلىسىمگە كەلدىك. "قازاقفيلم" جانە جوباعا جاۋاپتى ۇجىم جوبانى ءوزارا كەلىسىم ارقىلى اياقتاپ، "التىن ادام" انيماتسيالىق ءفيلمىن پروكاتقا شىعارادى. ودان تۇسكەن تازا تابىستىڭ 20%-ى كينو ورتالىعىنا اۋدارىلسا، قالعان 80%-ى "قازاقفيلمنىڭ" ۇلەسىندە قالادى. وسىلايشا "قازاقفيلم" اتالعان جوبانىڭ ءتۇسىرىلىم توبى الدىنداعى بەرەشەگىن وتەيتىن بولادى”، دەپ جازدى قۇرمانبەك جۇماعالي.
قۇرمانبەك جۇماعاليدىڭ ايتۋىنشا، ماسەلە زاڭ اياسىندا شەشىلمەك.
“ۇلتتىق كينونى قولداۋ ورتالىعىنىڭ تايقازانى ءسىز بەن ءبىزدىڭ قارجىمىزدان قۇرالعان. سوندىقتان ءار تيىننىڭ سۇراۋى بارىن ەسكەرۋىمىز قاجەت. ماسەلەنىڭ زاڭ تۇرعىسىنان شەشىلىپ جاتقانى دا سودان.
ءبىز تەك ءبارى زاڭ اياسىندا شەشىلسە دەيمىز. ايتپەسە، "قازاقفيلم" باسشىسى ازامات ساتىبالدىمەن ارازدىعىمىز جوق. “وسەر ەلدىڭ بالاسى ءبىرىن ءبىرى باتىر دەر” دەمەكشى، ازامات ەكەۋمىز دە وتاندىق كينونىڭ دامۋىنا مۇددەلىمىز جانە ءبىر-ءبىرىمىزدى قولداۋعا دايىنبىز.
ءبىزدىڭ بايقاۋىمىزشا، ەلدىڭ كينو سالاسىن كەرى تارتىپ، دامىعانىن قالامايتىن بەلگىسىز توپتار بار سەكىلدى. ارينە، ولاردىڭ نەگىزسىز پىكىرىنە كوپشىلىكتىڭ يلانباعانى ابزال. “وتىرىكتىڭ قۇيرىعى ءبىر-اق تۇتام”دەگەندەي، سالانىڭ تەك كەمشىلىگىن سانامالاۋعا بەيىم ادامداردىڭ استىرتىن نيەتى ءتۇبى اشكەرە بولاتىنى ءسوزسىز. مۇنداي قولايسىز جاعدايدى تۋدىراتىن جاعىمسىز پىكىرلەرگە قاراماستان، ءبىز دامۋعا بەت تۇزەگەن باعىتىمىزدان جاڭىلماي، جۇمىستارىمىزدى ۇزدىكسىز جالعاستىرا بەرەمىز. ءبىر سوزبەن ايتقاندا، ەلدىڭ كينو سالاسىن ىلگەرى باستىرۋعا بار كۇشىمىزدى سالامىز”، دەدى ۇلتتىق كينونى قولداۋ ورتالىعىنىڭ باسقارما توراعاسى.
