دەپۋتات داۋلەت تۇرلىحانوۆتىڭ ۇلى سوتتالدى، دەپ حابارلايدى "ادىرنا" ۇلتتىق پورتالى Stan.kz اقپارات اگەنتتىگىنە سىلتەپ.
14 مامىر كۇنى جوعارعى سوت القاسى ەرلى-زايىپتى زاڭگەرلەر چەرنوۆتارعا شابۋىل جاساعان بولات نۇراسىلدىڭ ءىسىن قايتا قاراپ، وعان جاڭا جازا تايىندادى.
2023 جىلدىڭ قازان ايىندا دەپۋتاتتىڭ ۇلى بولات نۇراسىل ادۆوكاتتاردى سوققىعا جىققان. الماتى گارنيزونى اسكەري سوتىنىڭ ۇكىمىمەن وعان 500 اەك كولەمىندە ايىپپۇل سالىندى.
ودان بولەك، جابىرلەنۋشىلەردىڭ پايداسىنا ارقايسىسى 500 مىڭ تەڭگە مورالدىق شىعىن جانە وكىلدىڭ قىزمەتىنە 1 600 000 تەڭگە وندىرىلگەن. دەگەنمەن ەرلى-زايىپتىلار جازاعا ريزا ەمەستىگىن مالىمدەدى.
“وعان پروباتسيالىق باقىلاۋدى قامتاماسىز ەتۋ جۇكتەلگەن. دەمەك ول شەتەلگە شىعا المايدى، كلۋبتار مەن بارلارعا بارا المايدى، ىشىمدىك ءىشىپ، باسقا دا قىلمىستاردى جاساي المايدى. پروباتسيا قىزمەتىنە حابارلاپ، ساعات 23.00-دە ۇيدە بولۋى كەرەك. ەگەر ول وسى شارتتاردى بۇزسا، سوت شارتتى جازانى ناقتى مەرزىمگە اۋىستىرىپ، ول جازاسىن كولونيادا وتەيدى", - دەدى اننا چەرنوۆا.
بولاتتان جابىرلەنۋشىلەردىڭ پايداسىنا اپەللياتسيالىق ساتىداعى سوتقا قاتىسۋ ءۇشىن وكىلدىڭ قىزمەتىنە 400 000 تەڭگە كولەمىندە شىعىن ءوندىرىلدى.
“قىلمىستىق ءىستى قاراۋ ناتيجەلەرى بويىنشا جوعارعى سوتتىڭ قىلمىستىق ىستەر جونىندەگى سوت القاسى سوت اكتىلەرىن وزگەرتىپ، بولاتقا 2 جىلعا باس بوستاندىعىن شەكتەۋ جازاسى تاعايىندالدى. سونداي-اق ارقايسىسىنا 1 ميلليون تەڭگەگە دەيىن مورالدىق زالالدىڭ وتەماقى مولشەرى ءوستى”، – دەپ مالىمدەدى جوعارعى سوت.
