«اق جول» پارتياسىنىڭ باسشىسى ازات پەرۋاشەۆ دەپۋتات اسقار سادىقوۆتى پارتيادان شىعارۋعا قاتىستى ماڭىزدى مالىمدەمە جاسادى. بۇل تۋرالى ول ازات Telegram كانالىندا جازبا جاريالادى، دەپ حابارلايدى “ادىرنا” ۇلتتىق پورتالى.
ازات پەرۋاشەۆتىڭ ايتۋىنشا، اسقار سادىقوۆقا قاتىستى بىرقاتار شاعىم تۇسكەن.
«اسقار سادىقوۆتىڭ پارتيادان شىعارىلعانى جونىندە جۋرناليستەردىڭ تولاسسىز سۇراقتارىنا تۇسىنىكتەمە بەرە كەتەيىن. پارتيامىزدىڭ اتىنا ا.سادىقوۆقا قاتىستى بىرقاتار شاعىمدار ءتۇستى، وندا ايتىلعان ءجايتتار پلەنۋمدا قارالىپ، ءتيىستى شەشىم شىعارىلدى. شاعىمداردىڭ دەنى ونىڭ تەرىس ءىس-ارەكەتتەرىنە، اتاپ ايتقاندا، وكىلەتتىگىن اسىرا پايدالانۋ مەن ەتيكالىق نورمالاردى بۇزۋىنا بايلانىستى بولدى. شاعىمداردىڭ ارقايسىسى بويىنشا جەكە-جەكە فاكتىلەر كەلتىرۋگە بولاتىن بولسا دا، ءبىر عانا مىسالدى اتاپ ءوتۋ جەتكىلىكتى دەپ ويلايمىن. ماسەلەن، پارلامەنتتە (پارتيادا ەمەس) جۇمىس ىستەيتىن ءبىر ايەل ادام ا.سادىقوۆتىڭ بىرنەشە رەت ۇياتسىز ۇسىنىستار جاساپ، قىسىم كورسەتكەنى تۋرالى ايتىپ ارىزداندى. ول ءوزىنىڭ سوزىنە دالەل رەتىندە ۆاتسابىنا ا.سادىقوۆتان كەلىپ تۇسكەن حابارلامالاردىڭ سكرينىن كورسەتتى (ەتيكالىق سەبەپتەرگە بايلانىستى ونىڭ بوپسالاۋىنا تاپ بولعان اتالعان جابىرلەنۋشىنىڭ ەسىمى جاسىرىلعان)»، - دەپ جازدى پەرۋاشەۆ.
ارىزدانۋشى 17 ساۋىردە ونىڭ قورلاعان ۇسىنىستارىنا جاۋاپ بەرمەگەنىن، 15 مامىردا بۇل ارەكەتتەر قايتالانعانىن العا تارتقان. ونىڭ ايتۋىنشا، ەكس-دەپۋتات بىرنەشە رەت جىنىستىق بوپسالاۋعا بارعان. الايدا ونىڭ دەپۋتاتتىق قول سۇعىلماۋشىلىعى سالدارىنان جابىرلەنۋشى قۇقىق قورعاۋ ورگاندارىنا جۇگىنە الماعان..
«پلەنۋم بارىسىندا وسىنداي اشكەرە بولعان زاڭسىز ارەكەتتەرگە جول بەرىلمەيتىندىگى تۋرالى ەسكەرتۋىمە جاۋاپ رەتىندە ا.سادىقوۆ «ءوزىنىڭ دەپۋتات ەكەنىن جانە كىمگە نە قالاسا سونى ايتۋعا قۇقىلى ەكەندىگىن» ايتتى. سوندىقتان، ءبىز بۇل كەدەرگىنى الىپ تاستادىق، ال، ا.سادىقوۆتى دەپۋتاتتىق مارتەبەسىنەن ايىرۋ تۋرالى قابىلدانعان شەشىم جابىرلەنۋشىگە ار-نامىسى مەن قادىر-قاسيەتىن قورعاۋعا مۇمكىندىك بەرەدى. ونىڭ لايىقسىز مىنەز-قۇلقىنىڭ باسقا دا فاكتىلەرى بار، سونىڭ نەگىزىندە وسىنداي شەشىم قابىلداندى. ولاردىڭ كەيبىرەۋلەرى قۇقىق قورعاۋ ورگاندارىنىڭ دا نازارىن اۋدارۋى مۇمكىن، ونداي جاعدايدا قاجەتتى كومەك كورسەتۋگە دايىنبىز. كورىپ وتىرعاندارىڭىزداي، وتە لاس جاعداي ورىن العان. بىرەۋدىڭ حابارلامالارىن وقىپ، ونى جاريالاۋعا ەش قۇلقىم جوق ەدى. الايدا، ءبىزدىڭ ۇنسىزدىگىمىزدى بىرەۋلەر باسقاشا تۇسىنگەن سياقتى، سۇحباتتىڭ بىرىندە ءوزىن 1937 جىلعى رەپرەسسيالار قۇرباندارىمەن سالىستىرىپ، "شىندىق" ءۇشىن جازىم بولعانداي قىلىپ جەتكىزگەن ا. سادىقوۆ تا سوعان سەبەپشى. بۇل "شىندىقتىڭ" دا شىنايى بەت ءجۇزىن كورسەتۋگە ءماجبۇرمىز، ودان باسقا دا ەپيزودتار مەن قۇجاتتار جەتەرلىك. پلەنۋم ناقتى فاكتىلەرگە سۇيەنە وتىرىپ ا. سادىقوۆتى پارتيادان شىعارۋ تۋرالى شەشىم قابىلدادى. سونىڭ ىشىندە، بۇل جاعدايلاردىڭ (بىرنەشەۋ) ودان دا قاۋىپتى سالدارى بولماس ءۇشىن. وزگە ادامداردىڭ ار-نامىسى مەن جەكە ومىرىنە قاتىستى بولعاسىن بۇل جاعدايدى كوپشىلىك الدىنا شىعارۋ ماعان وتە جيىركەنىشتى بولسا دا، وسى ماسەلە توڭىرەگىندەگى داۋ-داماي مەن الىپ-قاشپا اڭگىمەلەردىڭ نۇكتەسىن قويۋعا ءماجبۇرمىن»، - دەپ جازدى ازات پەرۋاشەۆ.
ايتا كەتسەك، «اق جول» قازاقستاننىڭ دەموكراتيالىق پارتياسى» قوعامدىق بىرلەستىگى ۇلتتىق كەڭەسىنىڭ 2024 جىلعى 1 شىلدەدەگى №1 قاۋلىcىنىڭ قابىلدانۋىنا بايلانىستى اسقار سادىقوۆ پارلامەنت ءماجىلىسىنىڭ دەپۋتاتى وكىلەتتىگىن جوعالتتى دەپ تانىلعان.
