استانادا ەكىنشى دۇنيەجۇزىلىك سوعىس ارداگەرى ميحايل گريگورەۆيچ كۋليكتىڭ مەموريالدىق تاقتاسى «بايقوڭىر» اۋدانىندا اشىلدى، دەپ حابارلايدى “ادىرنا” ۇلتتىق پورتالى.
اشىلۋ سالتاناتىنا استانا قالاسى اكىمىنىڭ ورىنباسارى ەسەت بايكەن، قالالىق ءماسليحات توراعاسى ەرلان كاناليموۆ، قالالىق ارداگەرلەر كەڭەسىنىڭ توراعاسى سانسىزباي ەسىلوۆ، قالالىق قورعانىس ىستەرى دەپارتامەنتىنىڭ باسشىسى ايدىن ساعىنبەك، ۇلى وتان سوعىس ارداگەرى ميحايل كۋليكتىڭ قىزى ۆالەنتينا كۋليك جانە قالا تۇرعىندارى قاتىستى.
«تاريحتى ەستە ساقتاۋ، بۇگىنگى كۇنمەن ءومىر ءسۇرۋ جانە جارقىن بولاشاقتى قۇرۋ – ءبىزدىڭ ازاماتتىق پارىزىمىز. سول سەبەپتى بارشاڭىزدى بۇگىنگى ۇلى جەڭىس كۇنىمەن قۇتتىقتايمىن. ءار وتباسىندا تەك بەيبىتشىلىك بولسىن. وسكەلەڭ ۇرپاق ءبىزدىڭ اتا-بابالارىمىز كورگەن قيىندىقتى كورمەي ءوسسىن. اتا-بابالاردىڭ ەرلىگىن جادىمىزدى ماڭگى ساقتاۋىمىز قاجەت. ويتكەنى ءوز تاريحىن سىيلاماعان ۇلتتىڭ – بولاشاعى جوق»، - دەدى قالالىق ءماسليحات توراعاسى ەرلان كاناليموۆ.
مەموريالدىق تاقتانى سالتاناتتى تۇردە قالالىق ارداگەرلەر كەڭەسىنىڭ توراعاسى سانسىزباي ەسىلوۆ پەن ميحايل كۋليكتىڭ قىزى ۆالەنتينا كۋليك اشتى.
«بۇگىنگى ءىس-شارا – وتە ماڭىزدى. ويتكەنى ارداگەردىڭ قالامىزعا تيگىزگەن ەڭبەگى – وتە زور. سوعىستان كەيىن ول وسى قالادا ەڭبەك ەتتى. ميحايل كۋليك – 2004-2023 جىلدار ارالىعىندا العاشقى تىڭ يگەرۋشىلەردىڭ ءبىرى. ول 1926 جىلى دۇنيەگە كەلىپ، 1943 جىلى سوعىسقا اتتاندى. سوعىس ارداگەرى 2 مارتە وتان وردەنىنىڭ يەگەرى، قىزىل جۇلدىز وردەنىنىڭ يەگەرى اتاندى. سول ەرلىگىمەن بۇگىندە ەلگە تانىمال بولدى. ميحايل گريگورەۆيچ – سونداي جاقسى ادام ەدى. ارداگەرلەر كەڭەسىندە وتەتىن ءار ءىس-شارانىڭ باس-قاسىندا جۇرەتىن. وكىنىشكە قاراي، بىلتىر ميحايل كۋليك قايتىس بولدى»، - دەدى استانا قالاسىنىڭ ارداگەرلەر كەڭەسىنىڭ توراعاسى سانسىزباي ەسىلوۆ.
سالتاناتتى راسىمنەن سوڭ ەركەعالي راحماديەۆ اتىنداعى مەملەكەتتىك اكادەميالىق فيلارمونيا وركەسترى جينالعان قاۋىمعا مەرەكەلىك كوڭىل-كۇي سىيلادى.
