Astanada Ekinshi dúnıejúzilik soǵys ardageri Mıhaıl Grıgorevıch Kýlıktiń memorıaldyq taqtasy «Baıqońyr» aýdanynda ashyldy, dep habarlaıdy “Adyrna” ulttyq portaly.
Ashylý saltanatyna Astana qalasy ákiminiń orynbasary Eset Baıken, qalalyq máslıhat tóraǵasy Erlan Kanalımov, qalalyq ardagerler keńesiniń tóraǵasy Sansyzbaı Esilov, qalalyq Qorǵanys isteri departamentiniń basshysy Aıdyn Saǵynbek, Uly Otan soǵys ardageri Mıhaıl Kýlıktiń qyzy Valentına Kýlık jáne qala turǵyndary qatysty.
«Tarıhty este saqtaý, búgingi kúnmen ómir súrý jáne jarqyn bolashaqty qurý – bizdiń azamattyq paryzymyz. Sol sebepti barshańyzdy búgingi Uly Jeńis kúnimen quttyqtaımyn. Ár otbasynda tek beıbitshilik bolsyn. Óskeleń urpaq bizdiń ata-babalarymyz kórgen qıyndyqty kórmeı óssin. Ata-babalardyń erligin jadymyzdy máńgi saqtaýymyz qajet. Óıtkeni óz tarıhyn syılamaǵan ulttyń – bolashaǵy joq», - dedi qalalyq máslıhat tóraǵasy Erlan Kanalımov.
Memorıaldyq taqtany saltanatty túrde qalalyq ardagerler keńesiniń tóraǵasy Sansyzbaı Esilov pen Mıhaıl Kýlıktiń qyzy Valentına Kýlık ashty.
«Búgingi is-shara – óte mańyzdy. Óıtkeni ardagerdiń qalamyzǵa tıgizgen eńbegi – óte zor. Soǵystan keıin ol osy qalada eńbek etti. Mıhaıl Kýlık – 2004-2023 jyldar aralyǵynda alǵashqy tyń ıgerýshilerdiń biri. Ol 1926 jyly dúnıege kelip, 1943 jyly soǵysqa attandy. Soǵys ardageri 2 márte Otan ordeniniń ıegeri, Qyzyl Juldyz ordeniniń ıegeri atandy. Sol erligimen búginde elge tanymal boldy. Mıhaıl Grıgorevıch – sondaı jaqsy adam edi. Ardagerler keńesinde ótetin ár is-sharanyń bas-qasynda júretin. Ókinishke qaraı, byltyr Mıhaıl Kýlık qaıtys boldy», - dedi Astana qalasynyń ardagerler keńesiniń tóraǵasy Sansyzbaı Esilov.
Saltanatty rásimnen soń Erkeǵalı Rahmadıev atyndaǵy Memlekettik akademııalyq fılarmonııa orkestri jınalǵan qaýymǵa merekelik kóńil-kúı syılady.
