استانادان بۋرابايعا بارعان مەكتەپ وقۋشىسى ەكسكۋرسيا كەزىندە قايتىس بولدى. بۇل جايىندا Nayza Kokshe Instagram پاراقشاسى جازدى، دەپ حابارلايدى “ادىرنا” ۇلتتىق پورتالى.
مالىمەتكە قاراعاندا، 5 مامىردا 18 وقۋشى استانادان بۋرابايعا ەكسكۋرسياعا كەلگەن. وقۋشىلاردىڭ ءبىرى جانىنداعى دوسىمەن جالدامالى ۆەلوسيپەد الىپ، سەرۋەنگە شىققان. "راكۋشكا" دەگەن تاستىڭ جانىندا جاسوسپىرىمدەردىڭ بىرەۋى رولگە يە بولا الماي، قاتتى جىلدامدىقپەن اعاشقا سوعىلادى. 16 جاستاعى بالا وقيعا ورنىندا قايتىس بولدى.
اقمولا وبلىستىق پوليتسيا دەپارتامەنتى قازىرگى كەزدە قاۋىپسىزدىك تالاپتارىنا جاۋاپ بەرمەيتىن قىزمەت كورسەتۋ فاكتىسى بويىنشا قىلمىستىق ءىس قوزعالعانىن حابارلادى.
«الدىن الا اقپاراتقا سايكەس، كامەلەت جاسقا تولماعان بالا ۆەلوسيپەدتى جالعا الىپ، اعاشقا سوعىلعان. ول العان جاراقاتىنان وقيعا ورنىندا كوز جۇمدى. قازىرگى كەزدە قاجەتتى ساراپتامالار تاعايىندالدى، تەرگەۋ شارالارى ءجۇرىپ جاتىر»، - دەيدى پوليتسيا دەپارتامەنتى.
وقيعا ورنىندا كوز جۇمعان بالا - استاناداعى BINOM مەكتەبىنىڭ 10-شى سىنىپ وقۋشىسى.
اقپاراتقا سايكەس، بۋرابايعا وقۋشىلارمەن بىرگە سىنىپ جەتەكشىسى دە بارعان. پەداگوگ جەدەل جاردەم مەن پوليتسيانى دا شاقىرعان. بۋرابايداعى ەكسكۋرسيانى اتا-انالار كوميتەتى ۇيىمداستىرعان.
