قارا حالىق سۋعا باتقاندا جۇرت الدىندا جۇرگەن جۇلدىزداردىڭ ارەكەتى جەلىدە تاراۋدا، دەپ حابارلايدى "ادىرنا" ءتىلشىسى.
قازاقپاراتتىڭ حابارلاۋىنشا الەۋمەتتىك جەلىدە «انشەيىندە حالقىم، ەلىم-جۇرتىم دەپ ەمىرەنىپ جۇرەتىن انشىلەر قايدا؟ حالقىنىڭ قاسىنان تابىلىپ، نەگە ەلدى كومەككە جۇمىلدىرمايدى؟» دەگەن سىني پىكىرلەر كوپتەپ جازىلعان.
ايتىسكەر اقىن اينۇر تۇرسىنباەۆا الەۋمەتتىك جەلىدە ەلدىڭ جاعدايىنا الاڭداپ وتىرعانىن جازدى.
"توپان سۋ باسىپ جاتقان ايماقتارداعى حالىقتىڭ جاعدايىنا الاڭداپ وتىرمىز. ءبىزدىڭ كۇشىمىز بىرلىكتە! بۇل قيىندىقتان دا امان وتەمىز. پرەزيدەنتىمىز بارلىق شىعىن وتەلەتىنىن ايتىپ جاتىر. ازاماتتار امان بولسا وسى جەرلەردە كەرەمەت قالاشىقتار بوي كوتەرىپ، ارتى توي بولاتىنىنا سەنەمىز. وتباسىمىزدىڭ اتىنان 5 ميلليون قارجى بەرىپ جاتىرمىز. اللا قالاسا بالالار كيىمدەرى، پامپەرس، تاعى باسقا كەرەك-جاراقتى الىپ ءار ايماققا تەڭدەي ءبولىپ تاراتامىز. ەلىمىزگە اللا جار بولسىن!" — دەپ جازدى ول.
ساحنادا جۇرگەن ءمادينا سادۋاقاسوۆا دا تاسقىن سۋدان زارداپ شەككەندەرگە 1 ملن تەڭگە قارجىلاي كومەك بەرىپ، ەلدى سابىرعا شاقىرعان.
"ەلىمىزدە بۇنداي تابيعي اپات بۇرىن-سوڭدى بولماعان. مۇنداي قيىن كەزەڭدەردە ءبىر-بىرىمىزگە قول ۇشىن بەرىپ، دەمەۋ بولايىق. سۋعا كەتكەن وڭىرلەردە قۇتقارۋ جۇمىسىن جۇرگىزىپ جاتقان ازاماتتارعا مىڭ العىس! گۋمانيتارلىق، قارجىلاي كومەك كورسەتىپ جاندارعا اللا رازى بولسىن. ءبىزدىڭ وتباسى دا ءوز ۇلەسىن قوسىپ، كاسپي بانك ارقىلى 1 ملن تەڭگە اۋداردىق! بۇل تەك باستاماسى، قولىمنان كەلگەنشە، الدە دە كومەك بەرۋدى توقتاتپايمىن، جالعاستىرامىن. اللام قازاقستاننىڭ ءار ءوڭىرىن تابيعي اپاتىنان ساقتاسىن", — دەدى ءانشى.
ودان بولەك باسى داۋدان ارىلمايتىن تورەعالي تورەالى، نۇربولات ابدۋللين جانە باسقا دا شوۋ بيزنەس وكىلدەرىنىڭ سۋ اپاتىنان زارداپ شەككەن حالىققا قارجىلاي كومەك اتاپ جاتقان ۆيدەولارى جەلىدە تاراعان.
ال ءانشى ەركە ەسماحان:
«سۋ تاسقىنىنان زارداپ شەگىپ جاتقان وڭىرلەرگە وتباسىمىزدىڭ اتىنان قولىمىزدان كەلگەنشە كومەك بەرۋدەمىز. قانشا قاراجات اۋدارعانىمىزدى كورسەتىپ، جاريالاپ، ايتۋىما، جولداسىم قارسى. جانۇيا بولعالى جاساعان قانشا ۇلكەندى-كىشىلى قايىرىمدىلىق، بەرگەن كومەگىمىزدى ايتقىزبادى. ءارى قاراي دا «ايتىپ، جازبايسىڭ» دەگەن شارت قويدى. كۇيەۋىم ء"ار ءىسىمىزدى اللا ءبىلىپ، رازى بولسا بولعانى» دەگەن ۇستانىممەن جۇرەدى»، - دەيدى ەركە ەسماحان.
ەركە ەسماحان قول قۋسىرىپ وتىرماعانىن جازدى.
«مەنىڭ جازعىم-اق كەلەدى. سەبەبى سىزدەر قول قۋسىرىپ قاراپ وتىر دەپ ويلاماسىن دەگەندەي. ونىمەن جولداسىمنىڭ تۇسىنىگى وسىنداي. سول ءۇشىن ارتىق ءسوز جازۋدان اۋلاق بولىڭىزدارشى. اللا سابىر بەرسىن! ءبىز دە ءدال سىزدەردەي حالىقپىز. مۇمكىن كەلەسى جىلى مەملەكەتىمىز مۇنداي جاعدايلارعا الدىن-الا دايىن بولار دەگەن ۇمىتتەمىز. ەلىمىز امان بولسىن!»، - دەيدى ءانشى.
ال بلوگەرلەر حالىقتان قاراجات جيناپ، ازىق-تۇلىك، كيىم-كەشەكپەن قولداۋ جىبەرىپ جاتقانىن جاريالاپ جاتىر.
