يسپانيادا الاپات سۋ تاسقىنىنان قازا تاپقاندار سانى 205 ادامعا جەتتى. كوپتەگەن ادام ءالى ءىز-ءتۇزسىز جوعالعاندىقتان، قازا تاپقاندار سانى ارتۋى مۇمكىن. بۇل تۋرالى قۇتقارۋ قىزمەتتەرى مالىمدەدى, دەپ حابارلايدى “ادىرنا” ۇلتتىق پورتالى.
يسپانيادا 30 قازانعا قاراعان ءتۇنى تولاسسىز جاۋعان جاڭبىردان كەيىن ەلدىڭ شىعىسىنداعى كوپتەگەن ايماقتاردى سۋ باسقان. اسىرەسە جەرورتا تەڭىزىندەگى ۆالەنسيا ايماعى قاتتى زارداپ شەكتى، مۇندا قۇتقارۋشىلار قازىردىڭ وزىندە 202 ولگەن ادامنىڭ دەنەسىن تاپتى. كاستيلو-لا-مانچا مەن اندالۋسيادا تاعى بىرنەشە ادام قايتىس بولدى.
ءبىر كۇن بۇرىن بيلىك كەم دەگەندە 158 قۇربان بولعانىن حابارلادى. تابيعي اپاتتان بەرى ءۇش كۇن وتكەندىكتەن، ءتىرى قالعانداردى تابۋ مۇمكىندىگى بارعان سايىن ازايىپ بارادى.
مەتەورولوگيالىق قىزمەتتىڭ مالىمەتىنشە، 30 قازانعا قاراعان ءتۇنى ۆالەنسيانىڭ بىرقاتار اۋداندارىندا بىرنەشە ساعاتتىڭ ىشىندە ءبىر شارشى مەترگە 300 ليتردەن استام جاڭبىر جاۋعان. چيۆا اۋىلىندا ءبىر شارشى مەترگە 491 ليتر جاڭبىر جاۋدى. بۇل وبلىستاعى جىلدىق جاۋىن-شاشىنعا سايكەس كەلەدى. سۋ مەن لايدىڭ كۇشتى اعىندارى كوپىرلەردى بۇزىپ، ادامداردى، ماشينالاردى، ءتىپتى تۇتاس ۇيلەردى الىپ كەتتى.
ۆالەنسيانىڭ ايماقتىق ۇكىمەتى حالىقتى الاپات جاڭبىردىڭ ىقتيمال سالدارى تۋرالى ەسكەرتۋگە كەشىككەنى ءۇشىن سىنعا الىندى. مىڭداعان ادامدار جارىقسىز قالدى، كوپتەگەن جولدار جۇرۋگە بولمايدى. بۇكىل اۋماقتار سىرتقى الەممەن بايلانىسى ۇزىلگەن، ادامدار اۋىز سۋ مەن ازىق-تۇلىك تاپشىلىعىنان زارداپ شەگۋدە.
يسپانيا ۇكىمەتى قۇتقارۋ وپەراتسياسىنا قاتىسقان ساربازدار سانىن 1200-دەن 1700-گە دەيىن ارتتىردى. ىزدەستىرۋ جۇمىستارىنا دروندار مەن ارنايى ۇيرەتىلگەن يتتەر قولدانىلادى.
