Qara halyq sýǵa batqanda jurt aldynda júrgen juldyzdardyń áreketi jelide taraýda, dep habarlaıdy "Adyrna" tilshisi.
Qazaqparattyń habarlaýynsha áleýmettik jelide «Ánsheıinde halqym, elim-jurtym dep emirenip júretin ánshiler qaıda? Halqynyń qasynan tabylyp, nege eldi kómekke jumyldyrmaıdy?» degen synı pikirler kóptep jazylǵan.
Aıtysker aqyn Aınur Tursynbaeva áleýmettik jelide eldiń jaǵdaıyna alańdap otyrǵanyn jazdy.
"Topan sý basyp jatqan aımaqtardaǵy halyqtyń jaǵdaıyna alańdap otyrmyz. Bizdiń kúshimiz birlikte! Bul qıyndyqtan da aman ótemiz. Prezıdentimiz barlyq shyǵyn óteletinin aıtyp jatyr. Azamattar aman bolsa osy jerlerde keremet qalashyqtar boı kóterip, arty toı bolatynyna senemiz. Otbasymyzdyń atynan 5 mıllıon qarjy berip jatyrmyz. Alla qalasa balalar kıimderi, pampers, taǵy basqa kerek-jaraqty alyp ár aımaqqa teńdeı bólip taratamyz. Elimizge Alla jar bolsyn!" — dep jazdy ol.
Sahnada júrgen Mádına Sádýaqasova da tasqyn sýdan zardap shekkenderge 1 mln teńge qarjylaı kómek berip, eldi sabyrǵa shaqyrǵan.
"Elimizde bundaı tabıǵı apat buryn-sońdy bolmaǵan. Mundaı qıyn kezeńderde bir-birimizge qol ushyn berip, demeý bolaıyq. Sýǵa ketken óńirlerde qutqarý jumysyn júrgizip jatqan azamattarǵa myń alǵys! Gýmanıtarlyq, qarjylaı kómek kórsetip jandarǵa Alla razy bolsyn. Bizdiń otbasy da óz úlesin qosyp, Kaspı bank arqyly 1 mln teńge aýdardyq! Bul tek bastamasy, qolymnan kelgenshe, álde de kómek berýdi toqtatpaımyn, jalǵastyramyn. Allam Qazaqstannyń ár óńirin tabıǵı apatynan saqtasyn", — dedi ánshi.
Odan bólek basy daýdan arylmaıtyn Tóreǵalı Tóreáli, Nurbolat Abdýllın jáne basqa da shoý bıznes ókilderiniń sý apatynan zardap shekken halyqqa qarjylaı kómek atap jatqan vıdeolary jelide taraǵan.
Al ánshi Erke Esmahan:
«Sý tasqynynan zardap shegip jatqan óńirlerge otbasymyzdyń atynan qolymyzdan kelgenshe kómek berýdemiz. Qansha qarajat aýdarǵanymyzdy kórsetip, jarııalap, aıtýyma, joldasym qarsy. Januıa bolǵaly jasaǵan qansha úlkendi-kishili qaıyrymdylyq, bergen kómegimizdi aıtqyzbady. Ári qaraı da «Aıtyp, jazbaısyń» degen shart qoıdy. Kúıeýim "Ár isimizdi Alla bilip, razy bolsa bolǵany» degen ustanymmen júredi», - deıdi Erke Esmahan.
Erke Esmahan qol qýsyryp otyrmaǵanyn jazdy.
«Meniń jazǵym-aq keledi. Sebebi sizder qol qýsyryp qarap otyr dep oılamasyn degendeı. Onymen joldasymnyń túsinigi osyndaı. Sol úshin artyq sóz jazýdan aýlaq bolyńyzdarshy. Alla sabyr bersin! Biz de dál sizderdeı halyqpyz. Múmkin kelesi jyly memleketimiz mundaı jaǵdaılarǵa aldyn-ala daıyn bolar degen úmittemiz. Elimiz aman bolsyn!», - deıdi ánshi.
Al blogerler halyqtan qarajat jınap, azyq-túlik, kıim-keshekpen qoldaý jiberip jatqanyn jarııalap jatyr.
