قازاقستان - ءارتۇرلى كورىكتى جەرلەرى مەن بىرەگەي تابيعي لاندشافتتارى بار تارتىمدى تۋريستىك باعىت. قازاقستانداعى بەلگىلى تۋريستىك ورىندارعا الماتى، استانا، شارىن كانونى، التاي تاۋلارى جانە بالقاش كولى جانە ايگىلى كولساي كولدەرى جاتادى.
سوڭعى جىلدارى قازاقستان ءوزىنىڭ تۋريستىك ينفراقۇرىلىمىن بەلسەندى دامىتىپ، شەتەلدىك تۋريستەردى تارتۋ ءۇشىن ءىس-شارالار جۇرگىزۋدە. مىسالى، ەلىمىز قازاقستاننىڭ تۋريستىك كورىكتى جەرلەرى مەن مادەنيەتىنە نازار اۋدارۋ ءۇشىن ءتۇرلى مادەني فەستيۆالدار، سپورتتىق ءىس-شارالار مەن كورمەلەر وتكىزەدى.
جالپى، ىشكى تۋريزم – ىشكى مادەني، تابيعي جانە تاريحي كورىكتى جەرلەردى زەرتتەۋ جانە ونى دامىتۋ. ول ەكونوميكانىڭ ماڭىزدى سالاسى بولىپ تابىلادى جانە ىشكى ءتۋريزمدى دامىتۋدىڭ ەلدەگى جاڭا جۇمىس ورىندارى مەن كۋرورتتىق جانە مادەني ورتالىقتارىن اشۋ ارقىلى كولىك جانە بولشەك ساۋدا سالاسىنا دا دامىپ، جەتىلۋىنە دە اسەرى مول.
ءتۋريزمنىڭ دامۋى جولدار، قوناقۇيلەر، مەيرامحانالار جانە باسقا دا تۋريستىك نىساندار سياقتى تۋريستىك ينفراقۇرىلىمدى جاقسارتۋ –مادەني مۇرانى ساقتاۋعا، جۇمىس ورىندارىن قۇرۋعا جانە جەرگىلىكتى حالىقتىڭ ءومىر ءسۇرۋ ساپاسىن جاقسارتادى. جاقىندا، مادەنيەت جانە سپورت مينيسترلىگىنىڭ حابارلاۋىنشا، 2023 جىلدا ەلگە كەلگەن تۋريستەر سانى 2,3 ەسە وسكەنى بەلگىلى بولدى. بۇل دەگەنىمىز قاڭتار-ناۋرىز ارالىعىندا قازاقستانعا 227,7 مىڭ شەتەلدىك تۋريست كەلگەن، ناقتىراق، 130 مىڭ ادامعا نەمەسە 2,3 ەسەگە كوبەيگەن. سونداي-اق قازاقستاننىڭ ءوز ىشىندە 1 ملن 348 مىڭ قازاقستاندىق ساياحات جاساعان.
سونىمەن قاتار جىل قورىتىندىسى بويىنشا، قازاقستان ءتۋريزمنىڭ جاھاندىق رەيتينگىندە 117 ەلدىڭ ىشىندە 66-شى ورىنعا جايعاسقان.
وسى ماقساتتا قازاقستانداعى ىشكى ءتۋريزمدى ارى قاراي دامىتۋ ءۇشىن ونەردى، مادەنيەتتى، ىشكى ءتۋريزمدى، تاريحي مۇرا وبەكتىلەرىن جانە شىعارماشىلىق يندۋستريانى دامىتۋ سالاسىنداعى اقپاراتتىق-ءتۇسىندىرۋ قىزمەتىن قامتاماسىز ەتۋ ەلدەگى وسى سالالاردى دامىتۋدىڭ ماڭىزدى اسپەكتىسى بولىپ تابىلادى. بۇل ءوز كەزەگىندە كەسەنەلەر، ساۋلەت ەسكەرتكىشتەرى جانە باسقا دا تاريحي ماڭىزى بار ورىندار سياقتى قازاقستاننىڭ تاريحي مۇرا وبەكتىلەرىن تانىمال ەتۋگە باعىتتالعان.
اتالعان سالالاردا اقپاراتتىق-ءتۇسىندىرۋ قىزمەتىن قامتاماسىز ەتۋدە قوعامدىق ۇيىمدار، مەملەكەتتىك مەكەمەلەر، مادەني ورتالىقتار، تۋريستىك اگەنتتىكتەر جانە باسقا دا ۇيىمدار ماڭىزدى ءرول اتقارادى. ولار اقپاراتتىق رەسۋرستاردى قۇرۋ، شارالار قابىلداۋ بويىنشا بەلسەندى جۇمىس ىستەيدى.
وسى تۇستا قازاقستانداعى ىشكى ءتۋريزمدى دامىتۋعا ىقپال ەتەتىن بىرنەشە شارالار مەن باستامالاردى اتاپ وتسەك:
ينفراقۇرىلىم جانە قىزمەتتەر: قوناق ۇيلەر، مەيرامحانالار، كولىك قىزمەتتەرى جانە كورىكتى جەرلەر سياقتى تۋريستىك ينفراقۇرىلىمدى ۇنەمى جەتىلدىرۋ تۋريستەردى كوبىرەك تارتۋعا كومەكتەسەدى. سونداي-اق تۋريستىك مارشرۋتتار باعىتتارىن جوسپارلاۋ: تاريحي قالالار، تابيعي ساياباقتار، مادەني كورىكتى جەرلەر جانە ۇلتتىق ساياباقتار ارقىلى ساياحاتتاۋ سياقتى ءارتۇرلى تۋريستىك مارشرۋتتاردى قۇرۋ جانە ىلگەرىلەتۋ – تۋريستەرگە تانىلماعان تاريحي ورىنداردى ءناسيحاتتاۋ. ىشكى تۋريزمدە ەسكەرە كەتەتىن ەڭ باستى قۇندىلىقتىڭ ءبىرى – ۇلتتىق مادەنيەتتى ىلگەرىلەتۋ. مادەني ءىس-شارالاردى، فەستيۆالدار مەن كورمەلەردى ۇيىمداستىرۋ ارقىلى ۇلتتىق مادەنيەت پەن داستۇرلەردى تانىتۋ – ەلدىڭ بىرەگەي مادەنيەتى مەن تاريحىمەن تانىسۋعا مۇمكىندىك بەرىپ قانا قويماي، تۋريستەردىڭ قازاقستانعا دەگەن قىزىعۋشىلىعىن ارتتىرا تۇسەدى;
اۋىلدىق ءتۋريزمدى دامىتۋ. بۇل اۋىلدىق جەرلەردىڭ دامۋىنا جانە جەرگىلىكتى حالىقتىڭ ەكونوميكالىق ءال-اۋقاتىنىڭ جاقسارۋىن قامتاماسىز ەتىپ قانا قويماي، اۋىلدىق تۋريزم مەن اگروتۋريزمدى دامىتىپ، ءداستۇرلى قولونەرمەن جانە اۋىل شارۋاشىلىعىمەن تانىسۋعا مۇمكىندىك بەرەدى. ايتا كەتەرلىگى، ىشكى تۋريزم شاعىن جانە ورتا بيزنەستى دامىتۋ ءۇشىن قولايلى جاعداي جاسايدى. وتباسىلىق قوناق ۇيلەر، مەيرامحانالار جانە تۋريستىك اگەنتتىكتەر سياقتى كوپتەگەن تۋريستىك كاسىپورىندار شاعىن جانە ورتا بيزنەس بولىپ تابىلادى. بۇل كاسىپورىنداردىڭ دامۋى جاڭا جۇمىس ورىندارىن قۇرۋعا جانە ەلدىڭ ءارتۇرلى ايماقتارىندا ەكونوميكالىق ءال-اۋقاتتى جاقسارتۋعا ىقپال ەتەدى.
ايتا كەتەيىك، قازاقستاندا ىشكى ءتۋريزمدى دامىتۋ ماقساتىندا شەتەلدىك تۋريستەردى تارتاتىن ءتۇرلى سپورتتىق ءىس-شارالار وتكىزىلەدى. ولاردىڭ قاتارىنا گولف، تەننيس چەمپيوناتتارىن اتاپ ايتساق بولادى. بۇل تۋرنيرلەرگە قاتىسۋ نەمەسە جارىستاردى كورۋ ءۇشىن قازاقستانعا الەمنىڭ تۇكپىر-تۇكپىرىنەن اۋەسقوي سپورتشىلار كەلەدى. سونداي-اق ەكسترەمالدى سپورت تۇرلەرى بويىنشا ەلىمىزدە ۆەلوسيپەد سپورتى، تاۋ شاڭعىسى، پاراشيۋت سپورتى جانە ت.ب. سياقتى سپورت تۇرلەرى بويىنشا ءتۇرلى سايىستار ۇيىمداستىرىلادى.
