تۋريزم-داۋىرلەردىڭ كۋاسى. ەلدىڭ بولمىس-ءبىتىمى مەن دامۋىنىڭ دارا جولدارى ايشىقتالاتىن باستى باعىتى دا وسى سالا. سول سەبەپتى، ءتۋريزىمدى قاي جەردىڭ بولماسىن كۇرە تامىرى دەپ ايتۋعا بولادى. ەلىمىزدە كوركەم مەكەندەرى كوز تارتاتىن اسەم مەكەندەر جەتەرلىك. ونىڭ ىشىندە، الماتى وبلىسىنىڭ اسەم ولكەلەرىن ايتپاسقا بولماس.
وتكەن جىل الماتى وبلىسىندا تۋريزم سالاسى ءۇشىن اسا تابىستى بولدى. ىشكى تۋريزم 13 پايىزعا ۇلعايىپ، كەلۋشىلەر سانى 1,1 ملن. ادامعا جەتكەن. ءوڭىردىڭ تۋريستىك الەۋەتى جىل وتكەن سايىن جاندانۋدا. «E-Qonaq» جۇيەسىنىڭ دەرەكتەرى بويىنشا 2024 جىلدىڭ باسىنان باستاپ بۇگىنگى تاڭدا كەلۋشىلەر سانى 52 752 ءتۋريستى قۇرادى.
مۇنداعى مىنسىزدىكتى كورۋگە اسىققانداردىڭ قاراسى الاتاۋدىڭ اسىل جاۋھارى سانالاتىن كولساي جانە قايىڭدى كولدەرىنە اعىلعان. تامىلجىعان تابيعاتى قۇتتى قوناعىن مەن مۇندالاپ شاقىراتىن كيەلى ولكە كەگەن، تۋريزىمدە وبلىستىڭ «جۇرەگىنە» اينالعانى بەسەنەدەن بەلگىلى.
تەڭىز دەڭگەيىنەن 2800 مەترگە دەيىنگى بيىكتىكتە ورنالاسقان كولساي كولدەرى، ءمولدىر سۋى مەن قىلقان جاپراقتى ورمانىمەن كەلۋشىلەردىڭ جانارىن اربايدى. بۇگىندە بۇل ماڭداعى ينفراقۇرىلىم جۇيەسى مەن تۋريستەرگە قىزمەت كورسەتۋ ساپاسى الدە قايدا ارتقان. سودان بولسا كەرەك، 1 جىلدا 300 مىڭعا جۋىق ادام كولساي كولدەرىن تاماشالاعان.
كەگەن اۋدانىنىڭ اكىمى نۇرباقىت تەڭىزباەۆتىڭ ايتۋىنشا، كولسايدان بولەك، تۋريستىك ورىنداردا كەلۋشىلەردى قابىلداپ جاتىر.
«كەگەننىڭ تابيعاتىنىڭ ءوزى سۇرانىسقا يە. بىزدەن كەرەگى سول سۇلۋلىقتى كوركەم تۇردە كورسەتۋ. ءبىزدىڭ اۋداندا مىڭ جىلقى، شارقۇدىق سىندى جەرلەر مەن تۇيىق، ەلتاي سارقىرامالارى بار. ورتا مەركى، شەت مەركى دەپ اتالاتىن ورىنداردا تۋريستەردىڭ قىزىعۋشىلىعىن تۋدىرۋدا»،-دەيدى اۋدان باسشىسى.
كەگەنگە كەلگەندەردىڭ اتباسىن بۇرماي كەتپەيتىن تاعى ءبىر تۋريستىك جەر-قايىڭدى كولى. 1911 جىلى پايدا بولعان كولگە وتكەن جىلى 100 مىڭ ادام كەلسە، بيىل جىل باسىنان بەرى 83 مىڭ تۋريست كەلگەن.
قايىڭى سىزىلتىپ ءان سالاتىن ايماقتا اتتى جول بار جانە تاكسي قىزمەتىدە جولعا قويىلعان. الداعى ۋاقىتتا كۇرە جولى جاسالسا، تۋريستەردىڭ سانى ەكى ەسە ارتادى دەپ كۇتىلۋدە.
