ۇلتتىق ەكونوميكا ءمينيسترىنىڭ مىندەتىن اتقارۋشى الىبەك قۋانتىروۆ ۇكىمەت وتىرىسىندا كورشى ەلدەرمەن شەكارالاس ايماقتاردا قونىس تەپكەن اۋىلداردىڭ الەۋەتىن كوتەرۋ ماسەلەسىن ءسوز ەتتى. ەلىمىزدەگى 65 اۋداندا شەكارا بويىندا ورنالاسقان 1 283 اۋىل بار ەكەنىن مالىمدەدى، دەپ حابارلايدى "ادىرنا" ۇلتتىق پورتالى.
شەكارا بويىندا قونىستانعان اۋىل-ايماقتارعا 1,7 ملن حالىق تۇرادى. شەكارا ماڭىنداعى اۋىلداردىڭ الەۋەتىن ارتتىرۋ بويىنشا 290 جوبانى ىسكە اسىرۋ كوزدەلىپ وتىر.
"ەلىمىزدە 65 اۋداندا 1,7 ملن حالقى تۇراتىن بارلىعى 1283 شەكارا ماڭىنداعى اۋىل بار. "اۋىل – ەل بەسىگى" جوباسىن ىسكە اسىرۋ شەڭبەرىندە 2023 جىلعا 140 شەكارا ماڭىنداعى اۋىلدا 290 جوبانى ىسكە اسىرۋ جوسپارلانۋدا. اۋىلدىق اۋماقتاردى دامىتۋدىڭ 2023-2027 جىلدارعا ارنالعان جاڭا تۇجىرىمداماسىندا شەكارا ماڭىنداعى اۋماقتاردى دامىتۋعا ايرىقشا كوڭىل ءبولىندى", – دەدى قۋانتىروۆ.
ونىڭ ىشىندە، الەۋمەتتىك جانە ينجەنەرلىك ينفراقۇرىلىمدى سالۋ جانە جوندەۋ، وتاندىق تەلەارنالاردىڭ تسيفرلىق ەفيرلىك تەلە جانە راديو حابار تاراتۋىن قامتاماسىز ەتۋ، ەڭبەك تاپشىلىعى بار شەكارا ماڭى اۋىلدىق وكرۋگتەرىندەگى تۇرعىنداردىڭ جالاقىسىنا ۇستەمەاقى قوسۋ جانە باسقا باعىتتار بار. شەكارالاس ايماقتاردا ورنالاسقان ەلدى-مەكەن تۇرعىندارىنا وزگە دا جەڭىلدىكتەر بەرۋ مۇمكىندىگى كوزدەلگەن.
"بۇدان باسقا، وتكىزۋ پۋنكتتەرىنىڭ ينفراقۇرىلىمىن دامىتۋ كوزدەلگەن.
شەكارا ماڭىنداعى وڭىرلەردى قوسا العاندا، بۇكىل اۋىل حالقىنىڭ تابىسىن ارتتىرۋعا باعىتتالعان قۇرالداردىڭ ءبىرى "اۋىل اماناتى" جوباسىن ىسكە اسىرۋ بولادى. ول ءۇشىن ءاربىر اۋىلدىق وكرۋگتىڭ ماماندىعىن ايقىنداي وتىرىپ، سكرينينگ جۇرگىزۋ، سونداي-اق، جەكە قوسالقى شارۋاشىلىقتارعا ميكروكرەديت بەرۋ، سەرۆيستىك-وتكىزۋ كووپەراتيۆتەرىن قالىپتاستىرۋ، تەحنيكامەن جانە جابدىقپەن ليزينگكە قامتاماسىز ەتۋ شارالارى ىسكە اسىرىلاتىن بولادى", – دەدى الىبەك قۋانتىروۆ.
"ادىرنا" ۇلتتىق پورتالى
