اقش اكىمشىلىگى يراننىڭ سىرتقى ىستەر ءمينيسترى ابباس اراكچيدىڭ داۆوستا وتەتىن دۇنيەجۇزىلىك ەكونوميكالىق فورۋم اياسىندا امەريكالىق وكىلمەن كەزدەسۋ تۋرالى ءوتىنىشىن قابىلدامادى. بۇل تۋرالى WSJ جازدى، دەپ حابارلايدى “ادىرنا”.
باسىلىم اراب جانە ەۋروپالىق دەرەككوزدەرگە سىلتەمە جاساپ جازعانداي، اراكچي دۇنيەجۇزىلىك ەكونوميكالىق فورۋم قارساڭىندا اقش پرەزيدەنتىنىڭ ارنايى وكىلى ستيۆەن ۋيتكوففپەن كەزدەسۋ ۇيىمداستىرۋعا بىرنەشە رەت تالپىنعان. الايدا ۆاشينگتون بۇل باستامالاردى قولداماعان.
كەزدەسۋ تۋرالى ۇسىنىس يرانداعى ىشكى شيەلەنىستىڭ كۇشەيۋى مەن نارازىلىقتاردىڭ ارتۋىنا بايلانىستى اقش-تا ىقتيمال جاۋاپ قادامدارى تالقىلانىپ جاتقان تۇستا جاسالعانى اتاپ وتىلەدى. امەريكالىق تاراپ مۇنداي كەزدەسۋدىڭ جوسپارلانباعانىن جانە كۇن تارتىبىندە تۇرماعانىن مالىمدەگەن.
بۇعان دەيىن يران سىرتقى ىستەر ءمينيسترى ابباس اراگچي ميۋنحەندەگى قاۋىپسىزدىك كونفەرەنتسياسىنا شاقىرتۋىنان قاعىلعانىن حابارلادىق.
Report اگەنتتىگىنىڭ مالىمەتىنشە، ۇيىمداستىرۋشىلاردىڭ شەشىمى يرانداعى نارازىلىقتاردى كۇشپەن باسۋ وقيعالارىنا بايلانىستى قابىلدانعان.
ءباسپاسوز حابارلاماسىندا بىرنەشە اپتا بۇرىن يران ۇكىمەتىنىڭ وكىلدەرىنە، ونىڭ ىشىندە ابباس اراگچيعا شاقىرۋلار جىبەرىلگەنى ايتىلعانىمەن، «قازىرگى جاعدايعا بايلانىستى ميۋنحەن قاۋىپسىزدىك كونفەرەنتسياسى بۇل شاقىرۋلاردى كەرى الادى» دەلىنگەن.
ميۋنحەن قاۋىپسىزدىك كونفەرەنتسياسى بيىل 13–15 اقپان كۇندەرى وتەدى.
ال دۇنيەجۇزىلىك ەكونوميكالىق فورۋمنىڭ 2026 جىلعى وتىرىسى داۆوستا 19–23 قاڭتار ارالىعىندا وتەدى.
