ماسكەۋدە پوستكەڭەستىك ەلدەردىڭ ەگەمەندىگىنە قاتىستى پىكىرتالاس تۋدىرعان مالىمدەمە جاسالدى. فيلوسوف ءارى ساياساتتانۋشى الەكساندر دۋگين قازاقستاندى قوسا العاندا بىرقاتار مەملەكەتتەردىڭ تاۋەلسىز ءومىر ءسۇرۋ مۇمكىندىگىنە كۇمان كەلتىردى.
حالىقارالىق ەۋرازيالىق قوزعالىستىڭ باسشىسى بۇرىنعى كسرو قۇرامىنداعى ەلدەر ءۇشىن ەگەمەندىك تۇجىرىمداماسى ءوز ماڭىزىن جوعالتقانىن ايتتى. ينتەرنەتتە تاراعان ءسوزىنىڭ ۇزىندىسىندە ول الداعى «جاڭا مودەل» اياسىندا دەربەس مەملەكەت رەتىندە ءومىر ءسۇرۋى مۇمكىن ەمەس دەپ سانايتىن ەلدەردىڭ ءتىزىمىن اتادى. اتالعان قاتارعا ارمەنيا، گرۋزيا، ازەربايجان، قازاقستان جانە وزبەكستان كىردى. ونىڭ ايتۋىنشا، ۇلتتىق مەملەكەتتەر كەزەڭى اياقتالعان.
«بۇل جاڭا مودەلدە ەشقانداي ەگەمەن نارسە ءومىر سۇرە المايدى. ءبارى ءبىتتى. ەگەمەندىك اياقتالدى. ۇلتتىق مەملەكەتتەر وتكەننىڭ ەنشىسىندە قالدى. بۇل – قوقىس»، - دەپ تۇيىندەدى دۋگين، ءىس جۇزىندە ءوڭىر ەلدەرىنىڭ وتىز جىلدىق تاۋەلسىز دامۋ جولىن جوققا شىعارا وتىرىپ.
الەكساندر دۋگيننىڭ بۇل پىكىرلەرى قوعامدا كەڭ تالقىلاۋعا سەبەپ بولدى. ول 2014 جىلى Foreign Policy جۋرنالى جاساعان «الەمدەگى 100 جاھاندىق ويشىل» تىزىمىنە ەنگەن، سونداي-اق «گەوپوليتيكانىڭ نەگىزدەرى» اتتى ەڭبەكتىڭ اۆتورى. بۇل ەڭبەك بۇرىن رەسەي قارۋلى كۇشتەرى باس شتابى اكادەمياسىندا وقۋ قۇرالى رەتىندە قولدانىلعان.
ايتا كەتەيىك، قازاقستان بۇعان دەيىن الەكساندر دۋگينگە جانە بىرقاتار رەسەيلىك ساياساتكەرلەر مەن قوعام قايراتكەرلەرىنە ەلگە كىرۋگە تىيىم سالعان. تىيىم سالىنعان تۇلعالار قاتارىندا مەملەكەتتىك دۋما ۆيتسە-سپيكەرى پيوتر تولستوي، تەلەجۇرگىزۋشىلەر تينا كاندەلاكي، تيگران كەوسايان جانە ەۆگەني پريماكوۆ بار. بۇل شەشىم رەسەيلىك تاريحشى اندرەي گروزينگە استاناعا كىرۋگە رۇقسات بەرىلمەگەنى بەلگىلى بولعاننان كەيىن جاريا بولدى.
DW مالىمەتىنشە (باسىلىم رەسەيدە «شەتەلدىك اگەنت» دەپ تانىلعان), شەكتەۋلەر قازاقستاندى سىناعان نەمەسە ونىڭ مەملەكەتتىك ەگەمەندىگىنە كۇمان كەلتىرگەن جاريا مالىمدەمەلەرمەن بايلانىستى بولۋى مۇمكىن. الەكساندر دۋگين بۇعان دەيىن رەسەيدىڭ ورتالىق ازياداعى ىقپالىن كۇشەيتۋ قاجەتتىگى تۋرالى بىرنەشە رەت پىكىر ايتقان.
رەسەي تاراپى اتالعان شەكتەۋلەرگە قاتىستى ازىرگە رەسمي تۇسىنىكتەمە بەرگەن جوق.
