فوتو: Getty Images
گرەنلانديا مەن دانيادا اقش پرەزيدەنتى دونالد ترامپتىڭ ارالدى «ساتىپ الۋ» نەمەسە «باسىپ الۋ» تۋرالى مالىمدەمەلەرىنە قارسى مىڭداعان ادام كوشەگە شىقتى. بۇل جاعداي حالىقارالىق قاۋىمداستىق نازارىن اۋدارىپ، ەۋروپا ەلدەرى مەن ۆاشينگتون اراسىنداعى قارىم-قاتىناستى شيەلەنىستىرىپ جىبەردى. اقپاراتتى BBC جازدى، دەپ حابارلايدى "ادىرنا".
نارازىلىق اكتسيالارى دانيا استاناسى كوپەنگاگەندە جانە گرەنلانديانىڭ باس قالاسى نۋكتا ءوتتى. شەرۋگە شىققاندار «تارت قولىڭدى گرەنلانديادان!»، «يانكي، ۇيىڭە قايت!» جانە «گرەنلانديا ساتىلمايدى» دەگەن ۇراندار كوتەردى.
گرەنلانديالىق قاۋىمداستىقتاردى بىرىكتىرەتىن Inuit ۇيىمىنىڭ باسشىسى كاميللا سيزينگ بۇل مالىمدەمەلەردى حالىقتىڭ ءوز تاعدىرىن ءوزى شەشۋ قۇقىعىنا جاسالعان قىسىم دەپ باعالادى.
ء"بىز دانيا كورولدىگىنە قۇرمەت كورسەتۋدى جانە گرەنلانديانىڭ ءوزىن-ءوزى باسقارۋ قۇقىعىن ساقتاۋدى تالاپ ەتەمىز", – دەدى ول.
ايتا كەتەيىك، دونالد ترامپ گرەنلانديانى اقش-تىڭ ۇلتتىق قاۋىپسىزدىگى ءۇشىن «وتە ماڭىزدى ستراتەگيالىق نىسان» دەپ سانايدى. ونىڭ جوسپارىنا قولداۋ بولماعاننان كەيىن، اقش پرەزيدەنتى ەۋروپالىق سەرىكتەستەرىنە ەكونوميكالىق قىسىم كۇشەيتۋگە كوشكەن.
اقپاراتقا سايكەس، 1 اقپاننان باستاپ دانيا، نورۆەگيا، شۆەتسيا، فرانتسيا، گەرمانيا، ۇلىبريتانيا، نيدەرلاندى جانە فينليانديادان كەلەتىن تاۋارلارعا 10 پايىزدىق باج سالىعى ەنگىزىلەدى.
ال 1 ماۋسىمنان باستاپ، ەگەر گرەنلانديانى ساتىپ الۋ جونىندە كەلىسىمگە قول جەتكىزىلمەسە، بۇل تاريفتەردىڭ مولشەرى 25 پايىزعا دەيىن ءوسۋى مۇمكىن.
