«KazSat-3R» سپۋتنيگىن قۇرۋعا بولجاممەن 87,2 ملرد تەڭگە قاجەت. بۇل تۋرالى پرەمەر-مينيستر ولجاس بەكتەنوۆ دەپۋتاتتاردىڭ ساۋالىنا بەرگەن جاۋابىندا ايتتى, دەپ حابارلايدى “ادىرنا” ۇلتتىق پورتالى.
«KazSat-3» سپۋتنيگىن اۋىستىرۋ ءۇشىن عارىشتىق بايلانىس جۇيەسىن قۇرۋ جانە پايدالانۋعا بەرۋ» (بۇدان ءارى – «KazSat-3R» جوباسى) بويىنشا جوبالاۋ الدىنداعى جۇمىستار جۇرگىزىلىپ جاتقانىن حابارلايمىز. ءتۇرلى ەۋروپالىق جانە ازيالىق عارىش تەحنيكاسىن ءوندىرۋشى كومپانيالاردىڭ تەحنيكالىق-كوممەرتسيالىق ۇسىنىستارى قارالدى. قاراستىرىلعان ۇسىنىستاردى تالداۋ نەگىزىندە قازىرگى ۋاقىتتا ەكونوميكالىق ساراپتامادان ءوتىپ جاتقان ينۆەستيتسيالىق ۇسىنىس جاسالدى»، - دەدى ولجاس بەكتەنوۆ جاۋابىندا.
سونىمەن قاتار، ول سپۋتنيكتى قۇرۋدىڭ بولجامدى قۇنى 87,2 ملرد تەڭگە ەكەنىن ايتتى. ونىڭ ىشىندە رەسپۋبليكالىق بيۋدجەت ەسەبىنەن - 40,3 ملرد تەڭگە، «رعبو» اق مەنشىكتى قاراجاتى ەسەبىنەن - 46,9 ملرد تەڭگە.
«بۇل سوما سپۋتنيكتىك بايلانىس ارنالارى مەن تەلە-راديو حابارلارىن تاراتۋ قاجەتتىلىگىن ەسكەرە وتىرىپ، جوبانىڭ ينۆەستيتسيالىق تارتىمدىلىعى مەن ەكونوميكالىق تيىمدىلىگى ءۇشىن جەتكىلىكتى. ەكونوميكالىق ساراپتامادان ءوتۋ قورىتىندىسى بويىنشا باس مەردىگەر ءوندىرۋشىنى تاڭداۋ زاڭناماعا سايكەس جانە ەڭ ۇزدىك تەحنيكالىق شەشىمدەر مەن ەكونوميكالىق ورىندىلىقتى ەسكەرە وتىرىپ، كونكۋرس نەگىزىندە جۇرگىزىلەتىن بولادى»، - دەدى ول.
ايتا كەتسەك، 2014 جىلدىڭ 28 ساۋىرىندە بايقوڭىر عارىش ايلاعىنان «KazSat-3» قازاقستاندىق بايلانىس جانە حابار تاراتۋ سپۋتنيگى ۇشىرىلعان ەدى. 2016 جىلدىڭ 1 ناۋرىزىندا «OTAU TV» ۇلتتىق سپۋتنيكتىك تەلەۆيدەنيە ابونەنتتەرىن وسى بورتقا اۋىستىرىلعانى جانە سىناقتىڭ اياقتالعانى جاريالاندى. 2017 جىلى ەلىمىزدىڭ بارلىق تەلەحابارى «KazSat» ۇلتتىق بايلانىس جانە حابار تاراتۋ سپۋتنيكتەرىنە تولىقتاي كوشىرىلگەن بولاتىن.
