Qazaqstanda «Jasandy intellekt turaly» jaŋa zaŋ küşıne endı. Zaŋǧa qol qoiylǧan sätten bastap 60 kün öttı jäne belgılengen räsımderge säikes, bügınnen bastap qūjat tolyq kölemde qoldanysqa engızıldı. Būl turaly Jasandy intellekt jäne sifrlyq damu ministrlıgı mälım ettı, dep habarlaidy "Adyrna".
Qabyldanǧan zaŋ elde jasandy intellektını qoldanudyŋ qūqyqtyq negızın qalyptastyryp, saladaǧy memlekettık saiasattyŋ basty qaǧidaty — adam, onyŋ qūqyqtary, bostandyqtary men äl-auqatynyŋ basymdyǧy turaly erejelerdı bekıtedı. Adam, onyŋ ömırı men erık-jıgerı jasandy intellekt jüielerın qūru jäne paidalanuda eŋ joǧarǧy qūndylyq retınde qarastyrylady. Jİ-dı qoldanu adamnyŋ sanaly türde şeşım qabyldau qabıletın şektemeuı tiıs, al azamattardyŋ erkındıgı tehnologiialardy qoldanudyŋ barlyq kezeŋınde saqtaluy qajet.
«Zaŋ jasandy intellektını paidalanudy, atap aitsaq ädıldık pen teŋdık, algoritm aşyqtyǧy men tüsınıktılıgı, jauapkerşılık pen baqylauda boluy, derekter men qūpiialyqty qorǧau, sondai-aq Jİ jüielerınıŋ qauıpsızdıgı men senımdılıgı turaly erejelerdı aiqyndaidy. Paidalanuşylarǧa jasandy intellekt jüielerınıŋ mümkındıkterı, sipattamalary men şekteulerı turaly tolyq aqparat ūsynyluy şart», – delıngen habarlamada.
Azamattar avtomattandyrylǧan derekterdı öŋdeudıŋ qoldanyluy, onyŋ saldary, mūndai öŋdeuge qarsylyq bıldıru mümkındıgı, sondai-aq öz qūqyqtary men zaŋdy müddelerın qorǧau tetıkterı turaly habardar boluǧa qūqyly.
Qūjat jasandy intellekt jüielerınıŋ ielerı men paidalanuşylary arasyndaǧy jauapkerşılıktı naqtylaidy. Jİ jüielerınıŋ ömırlık siklınıŋ barlyq qatysuşylary olardyŋ jūmysyn baqylaudy qamtamasyz etuge, täuekelderdı basqaruǧa jäne jüieler jūmysynyŋ nätijelerı üşın Qazaqstan Respublikasynyŋ zaŋnamasyna säikes jauapkerşılık aluǧa mındettı.
Jasandy intellekt jüielerın qūru jäne paidalanu qorşaǧan ortaǧa terıs äser etpeuı, sondai-aq energiia tiımdılıgı talaptaryn saqtai otyryp jüzege asyryluy tiıs.
«Jİ jüielerın paidalanu jeke derekter men qūpiia aqparatty qorǧau talaptary saqtalǧan jaǧdaida ǧana rūqsat etıledı. Zaŋ derekterge rūqsatsyz qol jetkızudıŋ aldyn alu şaralaryn, sapaly derekterdı paidalanudy, Jİ jüielerınıŋ qauıpsızdıgı men senımdılıgın qamtamasyz etudı közdeidı», – dep habarlady vedomstvodan.
Qūjatqa säikes, jasandy intellekt jüielerı täuekel deŋgeiı boiynşa — tömen, orta jäne joǧary täuekeldı jüielerge jıkteledı. Maŋyzdy salalarda nemese memlekettık aqparattyq resurstardy qalyptastyru kezınde qoldanylatyn joǧary täuekeldı jüieler aqparattyq qauıpsızdık talaptary boiynşa memlekettık jüielerge teŋestırıledı.
Endı Qazaqstan aumaǧynda:
- manipuliativtı ädısterdı qoldanatyn;
- adamnyŋ jasyna, densaulyq jaǧdaiyna nemese äleumettık märtebesıne bailanysty osal tūstaryn paidalanatyn;
- äleumettık nemese biometriialyq kemsıtuşılıkke jol beretın;
- adamnyŋ emosiiasyn onyŋ kelısımınsız anyqtaityn;
- jeke derekter turaly zaŋnamany būzatyn;
- tyiym salynǧan kontent jasaityn nemese taratatyn jasandy intellekt jüielerın qūruǧa jäne paidalanuǧa tyiym salynady.
Zaŋ jasandy intellektını paidalanudyŋ aşyqtyǧyna qoiylatyn talaptardy belgıleidı. Paidalanuşylar tauarlar, jūmystar nemese qyzmetter Jİ-dı qoldanu arqyly jasalǧanyn bıluı şart. Sintetikalyq kontent mındettı türde taŋbalanuǧa jäne paidalanuşylar üşın tüsınıktı eskertumen belgılenuı tiıs.
Jasandy intellektını paidalanu arqyly jasalǧan tuyndylar adamnyŋ şyǧarmaşylyq ülesı bolǧan jaǧdaida ǧana «avtorlyq qūqyq obektısı» dep tanylady. Adamnyŋ ziiatkerlık qyzmetınıŋ nätijesı arqyly alynǧan mätındık sūraular (prompttar) da avtorlyq qūqyqpen qorǧalady. Avtor nemese qūqyq iesı tyiym salmaǧan jaǧdaida ǧana Jİ modelderın oqytu üşın tuyndylardy paidalanuǧa rūqsat etıledı.
«Jasandy intellekt turaly» zaŋnyŋ küşıne enuı Qazaqstanda jauapty, qauıpsız jäne adamǧa baǧdarlanǧan jasandy intellektını damytudaǧy maŋyzdy kezeŋ. Būl model innovasiialar, azamattardyŋ qūqyqtaryn qorǧau jäne sifrlyq ekonomikanyŋ ornyqty damuy arasyndaǧy tepe-teŋdıktı qamtamasyz etuge baǧyttalǧan.
