ۋكراينا پرەزيدەنتى زەلەنسكي اقش پرەزيدەنتى ترامپتىڭ «ۋكراينا رەسەيگە قاراعاندا بەيبىتشىلىككە از مۇددەلى» دەگەن سوزىمەن كەلىسپەيتىنىن مالىمدەدى، دەپ حابارلايدى "ادىرنا" ۇلتتىق پورتالى.
ونىڭ ايتۋىنشا، رەسەيدىڭ ۋكرايناعا جاساپ جاتقان ۇزدىكسىز سوققىلارى ماسكەۋدىڭ ەشقانداي كەلىسىمگە مۇددەلى ەمەستىگىن كورسەتەدى.
15 قاڭتار كۇنى ناتو باس حاتشىسى مارك ريۋتتەمەن تەلەفون ارقىلى سويلەسكەننەن كەيىن جاريالانعان ۆيدەوۇندەۋىندە زەلەنسكي ۋكراينا سوعىستى اياقتاۋعا كەدەرگى ەمەس ەكەنىن ايتتى.
«ۋكراينا ەشقاشان بەيبىتشىلىككە كەدەرگى بولعان ەمەس جانە بولمايدى»، – دەدى ول.
بۇعان دەيىن دونالد ترامپ Reuters اگەنتتىگىنە بەرگەن سۇحباتىندا ۋكراينا رەسەيگە قاراعاندا بەيبىت كەلىسىمگە «ازىراق دايىن» ەكەنىن ايتقان.
اقش-تىڭ اراعايىندىعىمەن جۇرگىزىلگەن كەلىسسوزدەر نەلىكتەن سوعىستى توقتاتپاعانى جونىندە سۇراققا ترامپ «زەلەنسكي» دەپ قىسقا جاۋاپ بەرگەن.
زەلەنسكيدىڭ ايتۋىنشا، رەسەيدىڭ ۋكراينا ەنەرگەتيكالىق ينفراقۇرىلىمىنا جاساعان شابۋىلدارى كرەملدىڭ بەيبىتشىلىككە ۇمتىلمايتىنىن دالەلدەيدى.
«رەسەيدىڭ زىمىراندارى، “شاحەد” دروندارى مەن ۋكراينانى جويۋ ارەكەتتەرى – رەسەيدىڭ ەشقانداي كەلىسىمگە مۇددەلى ەمەستىگىنىڭ ايقىن دالەلى»، – دەدى ۋكراينا باسشىسى.
ال كرەمل وكىلى دميتري پەسكوۆ ترامپتىڭ سوزدەرىمەن كەلىسەتىنىن ءبىلدىردى. ونىڭ ايتۋىنشا، رەسەي پرەزيدەنتى ۆلاديمير پۋتين مەن رەسەيلىك تاراپ كەلىسسوزدەرگە اشىق.
سونىمەن قاتار، Reuters اگەنتتىگى اقش بارلاۋ قىزمەتىنە سىلتەمە جاساپ، رەسەي پرەزيدەنتى ۆلاديمير پۋتين ءالى دە ۋكراينانىڭ بۇكىل اۋماعىن باقىلاۋعا الۋدى كوزدەپ وتىرعانىن حابارلادى.
ايتا كەتەيىك، وسىعان دەيىن اقش پرەزيدەنتى بەيبىت كەلىسىمنىڭ جاسالۋىنا ماسكەۋ ەمەس، كيەۆتىڭ دايىن ەمەستىگىن ايتىپ، پىكىر بىلدىرگەن.
