قازاقستاندا جەرلەۋ جانە قابىرلەردى كۇتىپ ۇستاۋ ەرەجەلەرىنە وزگەرىستەر ەنگىزىلدى. ۇلتتىق ەكونوميكا ءمينيسترىنىڭ مىندەتىن اتقارۋشى ءتيىستى بۇيرىققا قول قويدى. قۇجات 2026 جىلدىڭ 24 قاڭتارىنان باستاپ كۇشىنە ەنەدى، دەپ حابارلايدى "ادىرنا".
ەندى جەرگىلىكتى اتقارۋشى ورگاندار اۋماقتىڭ ەرەكشەلىكتەرىن، قۇرىلىس جاعدايىن جانە تاريحي-مادەني مۇرا نىساندارىن ساقتاۋ تالابىن ەسكەرە وتىرىپ، جەرلەۋ ءتارتىبىن ازىرلەيدى. ءاربىر قايتىس بولعان ادامعا كەمىندە التى شارشى مەتر جەر تەلىمى بولىنەدى. جەرلەۋ ءولىم تۋرالى كۋالىك نەمەسە كرەماتسيا جونىندەگى انىقتاما ۇسىنىلعاننان كەيىن زيراتتا نەمەسە كولۋمباريدە جۇزەگە اسىرىلادى.
كرەماتسيا جاسالعان جاعدايدا كۇل مارقۇمنىڭ اتى-ءجونى مەن تىركەۋ ءنومىرى كورسەتىلگەن ۋرنالارعا سالىنادى. كولۋمباريلەر مەن ازا قابىرعالارى ارنايى بەلگىلەنگەن اۋماقتاردا سانيتارلىق نورمالار ساقتالا وتىرىپ ورنالاستىرىلادى.
سونداي-اق قۇجاتتا تۋىستارىنىڭ ءوتىنىشى بويىنشا قوس قابىر قازۋ ءتارتىبى، ەرەكشە جاعدايلاردا قايتا جەرلەۋ، قابىرلەردى بەلگىلى ءبىر تەرەڭدىكپەن جوبالاۋ جانە ولاردىڭ اراقاشىقتىعى، سونداي-اق اباتتاندىرۋ تالاپتارى - ەسكەرتكىش، گۇلزار جانە ورىندىق ورناتۋ ەرەجەلەرى دە رەتتەلگەن.
بۇدان الدىن الماتىدا تاياۋدا كرەماتوري اشىلاتىنى حابارلانعان بولاتىن.
