اتىراۋ وبلىستىق ءماسليحاتى "اتىراۋ وبلىسىندا جەرلەۋ جانە قابىرلەردى كۇتۋ قاعيدالارىن بەكىتۋ تۋرالى" شەشىمىنىڭ جوباسىن قاراستىرۋدا. بۇل قۇجات 2019 جىلى ۇلتتىق ەكونوميكا مينيسترلىگى بەكىتكەن ۇلگىلىك قاعيدالار نەگىزىندە ازىرلەنگەن. قازىرگى ۋاقىتتا جوبا ءماسليحات دەپۋتاتتارىنىڭ قاراۋىنا جىبەرىلمەك، دەپ حابارلايدى "ادىرنا" ۇلتتىق پورتالى AtyrauPress-قا سىلتەپ.
ءماسليحات اپپاراتىنىڭ باسشىسى ەرجان تۇركىستانوۆ مالىمدەگەندەي، جاڭا قاعيدالار زيراتتاردى كۇتىپ ۇستاۋ، جەرلەۋ ءراسىمىن رەتتەۋ جانە سانيتارلىق نورمالاردى ساقتاۋ ماقساتىندا ازىرلەنگەن.
جەرلەۋ راسىمىنە قويىلاتىن نەگىزگى تالاپتار بار.
قابىرلەر اراسىنداعى قاشىقتىق كەمىندە 1 مەتر، ال ەنى جارتى مەتر بولۋى ءتيىس. قابىردىڭ تەرەڭدىگى جەر بەدەرىنە جانە جەر استى سۋلارىنىڭ دەڭگەيىنە قاراي كەمىندە 1,5 مەتر بولۋى كەرەك. ەگەر قايتىس بولعان ادام اسا قاۋىپتى ينفەكتسيادان كوز جۇمسا، قابىر تەرەڭدىگى 2 مەتر بولۋى شارت جانە تۇبىنە 10 سم حلورلى اك قاباتى سەبىلۋى ءتيىس. ءار قابىردىڭ ۇستىنە 0,5 مەتر بيىكتىكتە ءۇيىندى جاسالىپ، جاۋىن-شاشىننان قورعاۋ ءۇشىن ونىڭ شەتتەرى كەڭەيتىلەدى.
زيراتتاردى كۇتىپ ۇستاۋ جانە اباتتاندىرۋ دا قارالعان.
زيراتتار رەتتەلگەن قاتارلارعا ءبولىنىپ، جۇرەتىن جولدار قاراستىرىلادى. قالا اكىمدىگى جەرلەۋدى تىركەۋ جۇمىستارىن جۇرگىزەدى. ەگەر قايتىس بولعان ادامنىڭ تۋىستارى بۇرىنعى تۋىس قابىرىنىڭ جانىنا جەرلەۋدى قالاسا، بوس ورىن بولعان جاعدايدا جانە تۋىستىقتى دالەلدەيتىن قۇجاتتار ۇسىنىلسا، وعان رۇقسات بەرىلەدى. تۋىسى جوق ادامداردى جەرلەۋ بيۋدجەت قاراجاتى ەسەبىنەن جۇزەگە اسىرىلادى. زيرات اكىمشىلىگى بارلىق تۇرعىندارعا بىردەي قولجەتىمدى قىزمەت كورسەتەدى.
قۇجاتتىڭ ماقساتى – زيراتتاردا سانيتارلىق تالاپتاردى ساقتاۋ، جەرلەۋ ءراسىمىن جۇيەلەۋ جانە قوعامدىق ءتارتىپتى قامتاماسىز ەتۋ. ءماسليحات دەپۋتاتتارى جوبانى قاراعاننان كەيىن، ونىڭ ناقتى ەرەجەلەرى بەكىتىلۋى مۇمكىن.
