بيىلدان باستاپ ورتالىق ازيانىڭ كەيبىر ەلدەرىنىڭ ازاماتتارى اقش-قا تۋريستىك نەمەسە ىسكەرلىك ۆيزامەن بارۋ ءۇشىن 5 مىڭنان 15 مىڭ اقش دوللارىنا دەيىن كەپىلدىك جارنا تولەۋگە مىندەتتى. بۇعان نارازى بولعان قىرعىزستان ۆيزالىق ءتارتىپتى قايتا قاراۋدى ۇسىندى، دەپ حابارلايدى “ادىرنا” Fergana اقپاراتتىق رەسۋرسىنا سىلتەمە جاساپ.
2026 جىلى 1 قاڭتاردان باستاپ تۇركىمەنستان ازاماتتارى اقش-قا تۋريستىك نەمەسە ىسكەرلىك ۆيزامەن بارۋ ءۇشىن 5 مىڭنان 15 مىڭ اقش دوللارىنا دەيىن كەپىلدىك جارنا تولەۋگە مىندەتتى. بۇل تالاپ اقش مەملەكەتتىك دەپارتامەنتى جاريالاعان رەسمي قۇجاتتاردا كورسەتىلگەن.
اتالعان ءتارتىپ 2026 جىلدىڭ باسىنان بەرى جەتى ەلدىڭ ازاماتتارىنا قولدانىلىپ كەلگەن. تۇركىمەنستاننان بولەك، بۇل تىزىمگە بۋتان، بوتسۆانا، گۆينەيا، گۆينەيا-بيساۋ، ناميبيا جانە ورتالىق افريكا رەسپۋبليكاسى كىرگەن. قازىرگى ۋاقىتتا كەپىلدىك جارنا تالابى 13 مەملەكەتكە قاتىستى، ولاردىڭ باسىم بولىگى افريكا قۇرلىعىندا ورنالاسقان.
جاڭا ەرەجەگە سايكەس، ۆيزا راسىمدەۋ بارىسىندا ءوتىنىش بەرۋشى 5 مىڭ، 10 مىڭ نەمەسە 15 مىڭ دوللار كولەمىندە كەپىلدىك جارنا ەنگىزۋى ءتيىس. ناقتى سوما اقش كونسۋلدىعىنداعى سۇحبات ناتيجەسى بويىنشا جەكە تارتىپپەن بەلگىلەنەدى. تولەم اقش قارجى مينيسترلىگىنىڭ pay.gov ەلەكتروندى جۇيەسى ارقىلى قابىلدانادى. مەملەكەتتىك دەپارتامەنت باسقا تولەم سەرۆيستەرى ارقىلى اۋدارىلعان قاراجات ءۇشىن جاۋاپكەرشىلىك المايتىنىن ەسكەرتەدى.
كەپىلدىك جارنانىڭ تولەنۋى ۆيزانىڭ اۆتوماتتى تۇردە بەرىلەتىنىن بىلدىرمەيدى. ەگەر ۆيزا بەرۋدەن باس تارتىلسا، ءوتىنىش يەسى اقش اۋماعىنا مۇلدە كىرمەسە نەمەسە ەلدە بولۋ مەرزىمىن بۇزباي، ۋاقىتىندا شىقسا، تولەنگەن قاراجات تولىق كولەمدە قايتارىلادى.
سونىمەن قاتار، اقش زاڭناماسىنا سايكەس، كەپىلدىك جارنا تولەۋگە مىندەتتەلگەن ەلدەردىڭ ازاماتتارى اقش-قا تەك نيۋ-يورك، ۆاشينگتون جانە بوستون قالالارىنداعى ءۇش حالىقارالىق اۋەجاي ارقىلى عانا كىرە الادى.
اقش مەملەكەتتىك دەپارتامەنتىنىڭ مالىمەتىنشە، 2026 جىلعى 21 قاڭتاردان باستاپ كەپىلدىك جارنا تالاپ ەتىلەتىن ەلدەر ءتىزىمى كەڭەيەدى. جاڭارتىلعان تىزىمگە ورتالىق ازيانىڭ تاعى ەكى مەملەكەتى — قىرعىزستان مەن تاجىكستان قوسىلادى.
اقش-تىڭ جاڭا ۆيزالىق تالاپتارىنا بايلانىستى قىرعىزستان ۇكىمەتى دە ءوز ۇستانىمىن ءبىلدىردى. ەلدىڭ ۆيتسە-پرەمەرى ەدىل بايسالوۆ اقش ازاماتتارى ءۇشىن ۆيزاسىز رەجيمدى قايتا قاراۋدى ۇسىندى. ول بۇل تۋرالى X (بۇرىنعى Twitter) الەۋمەتتىك جەلىسىندەگى پاراقشاسىندا جازدى.
«ۆيزالىق ساياسات — بۇل تەڭدىك پەن ءوزارا قۇرمەت ماسەلەسى. ەگەر ءبىزدىڭ ازاماتتارىمىز ءۇشىن وسىنداي جوعارى كەدەرگىلەر ەنگىزىلسە، ءبىز ەشتەڭە بولماعانداي ارەكەت ەتە المايمىز»، — دەپ مالىمدەدى ول.
قىرعىزستان ازاماتتارىنا قاتىستى جاڭا ۆيزالىق ەرەجەلەر 21 قاڭتاردان باستاپ كۇشىنە ەنەدى. B-1 جانە B-2 ساناتىنداعى ۆيزالارعا ءوتىنىش بەرگەندەر 5 مىڭنان 15 مىڭ دوللارعا دەيىن كەپىلدىك جارنا تولەۋى ءتيىس. ەگەر ۆيزا مارتەبەسى وزگەرتىلسە نەمەسە ەلدە بولۋ مەرزىمى اسىپ كەتسە، بۇل قاراجات قايتارىلمايدى. كەپىلدىك جارنانىڭ ناقتى مولشەرىن كونسۋلدىق وفيتسەر سۇحبات بارىسىندا جەكە انىقتايدى.
The Diplomat باسىلىمىنىڭ مالىمەتىنشە، اقش ازاماتتارى 2012 جىلدان بەرى قىرعىزستانعا ۆيزاسىز كىرە الادى، ال قىرعىزستان ازاماتتارىنا اقش-قا ەشقاشان ۆيزاسىز رەجيم قولدانىلماعان. باسىلىم اۆتورى ۆيزالىق ساياساتتىڭ ەشقاشان تولىقتاي ءوزارا تەڭ بولماعانىن، اسىرەسە اقش-قا قاتىستى بۇل قاعيدانىڭ ساقتالمايتىنىن اتاپ وتكەن.
ايتا كەتەيىك، 2025 جىلدىڭ ماۋسىم ايىنىڭ باسىندا اقش پرەزيدەنتى دونالد ترامپ اقش-تى شەتەلدىك تەرروريستەردەن جانە ۇلتتىق ءارى قوعامدىق قاۋىپسىزدىككە تونەتىن وزگە دە قاتەرلەردەن قورعاۋ ماقساتىندا شەتەل ازاماتتارىنىڭ كىرۋىن شەكتەۋ تۋرالى قۇجاتقا قول قويعان بولاتىن. وسى شەشىم اياسىندا 19 ەلدىڭ ازاماتتارىنا اقش-قا كىرۋگە تولىق نەمەسە ءىشىنارا شەكتەۋ ەنگىزىلگەن. تۇركىمەنستان بۇل تىزىمگە ۆيزانىڭ مەرزىمىن اسىرىپ جىبەرۋ جاعدايلارىنىڭ كوپتىگىنە بايلانىستى ەنگىزىلگەن.
رەسمي اشحاباد بۇل شەشىمگە بايلانىستى تۇسىنىسپەۋشىلىك پەن الاڭداۋشىلىق ءبىلدىرىپ، اقش بيلىگىنىڭ ارەكەتىن اسىعىس قابىلدانعان قادام دەپ باعالادى. تۇركىمەنستاننىڭ سىرتقى ىستەر مينيسترلىگى بۇل شارالار ەكى ەل اراسىنداعى كوشى-قون ساياساتى مەن وزگە دە سالالارداعى ىنتىماقتاستىق ناتيجەلەرىن ەسكەرمەيتىنىن مالىمدەدى.
