الەۋمەتتىك جەلىدە الماتى قالاسىن دامىتۋ ورتالىعىنىڭ باسشىسى رۋسلان بەردەنوۆ ءدىني كوزقاراسىنا بايلانىستى ءوزى باسقارىپ وتىرعان مەكەمەدە جاڭاجىلدىق كورپوراتيۆتىك كەش وتكىزۋگە تىيىم سالدى دەگەن اقپارات تارادى. بۇل مالىمەت العاش رەت Threads پلاتفورماسىندا جاريالانعان، دەپ حابارلايدى “ادىرنا”.
جەلى قولدانۋشىسىنىڭ جازۋىنشا، رۋسلان بەردەنوۆ كورپوراتيۆتىك كەشتەن باس تارتىپ قانا قويماي، قىزمەتكەرلەرگە ارنالعان ءتاتتى سىيلىقتاردى دا تاراتپاعان.
«مۇنى ۇجىمعا “جاڭا جىل مۇسىلمانداردىڭ مەرەكەسى ەمەس” دەپ ءتۇسىندىردى. الايدا جاڭا جىل قازاقستاندا “مەرەكەلەر تۋرالى” زاڭعا سايكەس مەملەكەتتىك مەرەكە بولىپ سانالادى»، – دەپ جازدى جەلى قولدانۋشىسى.
الايدا رۋسلان بەردەنوۆ Instagram پاراقشاسىندا جازبا جاريالاپ، تاراعان حابارلامالاردىڭ شىندىققا جاناسپايتىنىن مالىمدەدى.
«قازاقستان – زايىرلى مەملەكەت. ءبىز كوپۇلتتى، كوپكونفەسسيالى ەلمىز. سوندىقتان مەن ءۇشىن، باسشى رەتىندە «دۇرىس» نەمەسە «بۇرىس» ءدىن مەن مادەنيەت وكىلدەرى دەگەن ۇعىم جوق جانە بولۋى دا مۇمكىن ەمەس. مەن ءۇشىن جاڭا جىل ەڭ الدىمەن وتباسىلىق مەيرام.
ءدىني سەبەپپەن مەرەكەنى اتاپ وتۋدەن باس تارتۋ، كورپوراتيۆتەردى نەمەسە جاڭا جىلدىق سىيلىقتاردى الىپ تاستاۋ تۋرالى ەشقانداي شەشىم قابىلدانعان جوق جانە ونداي شەشىم قابىلدانۋى دا مۇمكىن ەمەس.
«جاڭا جىل – مۇسىلمان مەرەكەسى ەمەس، سوندىقتان ءبىز قىزمەتكەرلەردى قۇتتىقتامايمىز» دەگەن مالىمدەمەلەر شىندىققا جاناسپايدى. وسىنداي حابارلامالارعا ساقتىقپەن قاراپ، تەكسەرىلمەگەن اقپاراتقا سۇيەنىپ، قورىتىندى جاساماۋلارىڭىزدى سۇرايمىن»، – دەدى ول.
بەردەنوۆتىڭ ايتۋىنشا، قازىر كومپانيانىڭ قاۋىپسىزدىك قىزمەتى بۇل جاعدايدى تەكسەرىپ جاتىر. اقپاراتتى كىم تاراتقانى جانە ونىڭ نەگە بۇرمالانعانى انىقتالىپ جاتىر.
