دەنساۋلىق ساقتاۋ ءمينيسترى اقمارال ءالنازاروۆا مەن جاپونيانىڭ قازاقستانداعى ەلشىسى يدزيما ياسۋساما اباي وبلىسىندا مەديتسينالىق ينفراقۇرىلىمدى دامىتۋعا 1,087 ملرد يەن (7 ملن دوللار) مولشەرىندە گرانت بەرۋ تۋرالى ۇكىمەتارالىق كەلىسىمدى ىسكە اسىرۋعا باعىتتالعان قۇجاتقا قول قويدى، دەپ حابارلايدى “ادىرنا”.
دسم اقپاراتىنشا، گرانت اقشاسىنا سەمەي مەديتسينا ۋنيۆەرسيتەتىنىڭ گوسپيتالىنە ارنالعان جوعارى تەحنولوگيالىق مەديتسينالىق جابدىقتار ساتىپ الىنادى. وعان مرت، كت، ەندوسكوپيالىق، رەانيماتسيالىق جانە وزگە دە جابدىقتاردى قوسا العاندا، زاماناۋي دياگنوستيكالىق جانە ەمدەۋ جۇيەلەرى كىرەدى.
«بۇل وڭىردە يادرولىق سىناقتاردان زارداپ شەككەن ادامدارعا زاماناۋي، ساپالى مەديتسينالىق كومەك كورسەتۋگە مۇمكىندىك بەرەدى. ياعني، ولار قاجەتتى تەكسەرۋ مەن ەمدى ءوز وڭىرىندە الا الادى»، - دەلىنگەن حابارلامادا.
بۇعان دەيىن ء«شوپ تامىرى» ادام قاۋىپسىزدىگىن قامتاماسىز ەتۋ بويىنشا وتەۋسىز كومەك باعدارلاماسى اياسىندا جاپونيا جامبىل وبلىستىق قان ورتالىعىنا 6 68,790 دوللار كولەمىندە گرانت بولگەن ەدى. بۇل اقشاعا قان ترومبوتسيتتەرىن ساقتاۋعا ارنالعان 5 اپپارات ساتىپ الىندى.
سونداي-اق وعان دەيىن جاپونيا ۇكىمەتى بولگەن گرانتتارعا سەمەي قالاسىنداعى جەدەل جاردەم اۋرۋحاناسىنا مەديتسينا قىزمەتكەرلەرىن شاقىرتۋ جۇيەسى ساتىپ الىندى، اكادەميك ن. باتپەنوۆ اتىنداعى ۇلتتىق تراۆماتولوگيا جانە ورتوپەديا عىلىمي ورتالىعىندا كومپيۋتەرلىك توموگرافيا كابينەتى جانە باسقالار اشىلدى.
بۇدان بولەك، كلينيكالىق زەرتتەۋلەردى، جابدىققا سەرۆيستىك قىزمەت كورسەتۋدى، JICA ءبىلىم بەرۋ باعدارلامالارىن جانە جاساندى ينتەللەكت نەگىزىندە تەلەمەديتسينالىق شەشىمدەردى بىرىكتىرە الاتىن Japan-Kazakhstan Medical Hub قۇرۋ جوباسى قاراستىرىلىپ جاتىر.
قازاقستاننىڭ دەنساۋلىق ساقتاۋ مينيسترلىگى جاپونيا ۇكىمەتىنە مەديتسينا سالاسىنا كورسەتكەن كومەگى ءۇشىن العىس ءبىلدىردى. قازاقستان الداعى ۋاقىتتا مەديتسينالىق تۋريزم، زاماناۋي تەحنولوگيالار، تسيفرلاندىرۋ، جاساندى ينتەللەكت پەن تەلەمەديتسينا باعىتتارى بويىنشا جاپونيامەن ىنتىماقتاستىقتى كەڭەيتۋگە دايىن، دەپ اتاپ ءوتتى ۆەدومستۆو.
