قازاقستاندىق كاسىبي سۋمو شەبەرى ەرسىن بالتاعۇل (كيمبودزان حارۋكي) جاپونيانىڭ توكيو قالاسىندا وتكەن حاتسۋ باسيو 2025 تۋرنيرىندە ءۇشىنشى ورىنعا يە بولىپ، ەل تاريحىنداعى ماڭىزدى جەتىستىككە قول جەتكىزدى، دەپ حابارلايدى "ادىرنا" ۇلتتىق پورتالى.
بۇل جەڭىسى ارقىلى كيمبودزان قازاقستاندىق سۋمو جانكۇيەرلەرىنىڭ ماقتانىشىنا اينالدى.
ءتۋرنيردىڭ نەگىزگى كەزەڭى اياقتالعان سوڭ، ءۇش بالۋان — قازاقستاندىق كيمبودزان حارۋكي، موڭعول حوسيوريۋ توموكاتسۋ جانە جاپوندىق وحو كونوسۋكە بىردەي ناتيجە كورسەتتى. چەمپيوندى انىقتاۋ ءۇشىن قوسىمشا راۋند (Tomoe-sen) ۇيىمداستىرىلدى. بۇل راۋندتا بالۋان قارسىلاستاردىڭ ارقايسىسىن ەكى رەت جەڭۋى ءتيىس بولاتىن. العاشقى جەكپە-جەكتە حوسيوريۋ كيمبودزاندى جەڭسە، كەلەسى كەزدەسۋىندە جاپوندىق وحو بالۋاندى دا جەڭىپ، تۋرنير چەمپيونى اتاندى. ناتيجەسىندە، وحو ەكىنشى ورىنعا، ال كيمبودزان ءۇشىنشى ورىنعا يە بولدى.
شەشۋشى كۇنگە دەيىن كيمبودزان 12 جەڭىس جانە 2 جەڭىلىسپەن كوش باستاپ تۇرعان بولاتىن. الايدا سوڭعى كەزدەسۋدە جاپون بالۋانى وحو كونوسۋكەگە ەسە جىبەردى. سول ۋاقىتتا حوسيوريۋ دا جەڭىسكە جەتىپ، ناتيجەسىندە ءۇش بالۋان بىردەي ناتيجە كورسەتىپ، قوسىمشا ميني-تۋرنير وتكىزىلدى.
كيمبودزان – كاسىبي سۋمو تاريحىندا مۇنداي دەڭگەيگە جەتكەن العاشقى قازاقستاندىق بالۋان. ونىڭ شىدامدىلىعى مەن تەحنيكاسى جانكۇيەرلەر مەن ساراپشىلاردىڭ جوعارى باعاسىنا يە بولدى. ەرسىن بالتاعۇل الداعى ۋاقىتتا چەمپيوندىق اتاق ءۇشىن قايتادان كۇرەسەدى دەگەن سەنىم بار.
