جاپونيا ۇكىمەتى 2026 قارجى جىلىنا ارنالعان مەملەكەتتىك بيۋدجەت جوباسىن ماقۇلدادى. قۇجاتقا سايكەس، 2026 جىلدىڭ ساۋىرىنەن باستالاتىن قارجى جىلىنداعى جالپى شىعىن كولەمى 122,3 ترلن يەندى (شامامەن 783 ملرد اقش دوللارى) قۇراپ، ەل تاريحىنداعى ەڭ جوعارى دەڭگەيگە جەتپەك، دەپ حابارلايدى "ادىرنا".
Report اگەنتتىگىنىڭ شەتەلدىك بۇقارالىق اقپارات قۇرالدارىنا سىلتەمە جاساپ حابارلاۋىنشا، بيۋدجەتتە قورعانىس سالاسىنا بولىنەتىن قاراجات تا رەكوردتىق كورسەتكىشكە جەتكەن. اسكەري شىعىندار 8,8 ترلن يەندى (شامامەن 56,3 ملرد دوللار) قۇرايدى.
اسكەري بيۋدجەتتىڭ ۇلعايۋى جاپونيا ۇكىمەتىنىڭ قورعانىس الەۋەتىن كۇشەيتۋ جانە سوققى بەرەتىن قارۋ-جاراق جۇيەلەرىن قارۋلى كۇشتەردىڭ قۇرامىنا ەنگىزۋ ساياساتىنا بايلانىستى. بۇعان دەيىن ەل پرەمەر-ءمينيسترى ساناە تاكايتي قورعانىس شىعىندارىن ىشكى جالپى ءونىمنىڭ 2 پايىزىنا مەرزىمىنەن بۇرىن جەتكىزۋ مىندەتىن قويعان بولاتىن. العاشىندا بۇل مەجەگە 2027 جىلعا قاراي جەتۋ جوسپارلانعان ەدى.
سونىمەن قاتار الەۋمەتتىك قامسىزداندىرۋعا بولىنەتىن شىعىندار دا رەكوردتىق دەڭگەيگە — 39 ترلن يەنگە (شامامەن 249,5 ملرد دوللار) دەيىن وسەدى. بۇل مەديتسينالىق قىزمەتتەر قۇنىنىڭ قىمباتتاۋىمەن جانە حالىقتىڭ قارتايۋىمەن بايلانىستى.
ۇكىمەت بولجامىنا سايكەس، سالىق تۇسىمدەرى 2026 قارجى جىلىندا 83,7 ترلن يەندى (شامامەن 535,5 ملرد دوللار) قۇرايدى. ال بيۋدجەت تاپشىلىعىن جابۋ ءۇشىن شىعارىلاتىن مەملەكەتتىك وبليگاتسيالار كولەمى 30 ترلن يەننەن (شامامەن 192 ملرد دوللار) اسپاۋى ءتيىس.
بۇل شەشىم قارجىلىق تۇراقتىلىقتى ساقتاپ، مەملەكەتتىك قارىز جۇكتەمەسىن ودان ءارى ۇلعايتپاۋعا باعىتتالعان. قازىرگى تاڭدا جاپونيانىڭ مەملەكەتتىك قارىزى ەلدىڭ ءجىو-سىنەن شامامەن ەكى ەسە كوپ.
2026 قارجى جىلىنا ارنالعان بيۋدجەت جوباسى 2026 جىلدىڭ باسىندا پارلامەنتتىڭ قاراۋىنا ەنگىزىلەدى.
