Japoniia ükımetı 2026 qarjy jylyna arnalǧan memlekettık biudjet jobasyn maqūldady. Qūjatqa säikes, 2026 jyldyŋ säuırınen bastalatyn qarjy jylyndaǧy jalpy şyǧyn kölemı 122,3 trln iendı (şamamen 783 mlrd AQŞ dollary) qūrap, el tarihyndaǧy eŋ joǧary deŋgeige jetpek, dep habarlaidy "Adyrna".
Report agenttıgınıŋ şeteldık būqaralyq aqparat qūraldaryna sılteme jasap habarlauynşa, biudjette qorǧanys salasyna bölınetın qarajat ta rekordtyq körsetkışke jetken. Äskeri şyǧyndar 8,8 trln iendı (şamamen 56,3 mlrd dollar) qūraidy.
Äskeri biudjettıŋ ūlǧaiuy Japoniia ükımetınıŋ qorǧanys äleuetın küşeitu jäne soqqy beretın qaru-jaraq jüielerın qaruly küşterdıŋ qūramyna engızu saiasatyna bailanysty. Būǧan deiın el premer-ministrı Sanae Takaiti qorǧanys şyǧyndaryn ışkı jalpy önımnıŋ 2 paiyzyna merzımınen būryn jetkızu mındetın qoiǧan bolatyn. Alǧaşynda būl mejege 2027 jylǧa qarai jetu josparlanǧan edı.
Sonymen qatar äleumettık qamsyzdandyruǧa bölınetın şyǧyndar da rekordtyq deŋgeige — 39 trln ienge (şamamen 249,5 mlrd dollar) deiın ösedı. Būl medisinalyq qyzmetter qūnynyŋ qymbattauymen jäne halyqtyŋ qartaiuymen bailanysty.
Ükımet boljamyna säikes, salyq tüsımderı 2026 qarjy jylynda 83,7 trln iendı (şamamen 535,5 mlrd dollar) qūraidy. Al biudjet tapşylyǧyn jabu üşın şyǧarylatyn memlekettık obligasiialar kölemı 30 trln iennen (şamamen 192 mlrd dollar) aspauy tiıs.
Būl şeşım qarjylyq tūraqtylyqty saqtap, memlekettık qaryz jüktemesın odan ärı ūlǧaitpauǧa baǧyttalǧan. Qazırgı taŋda Japoniianyŋ memlekettık qaryzy eldıŋ JIÖ-sınen şamamen ekı ese köp.
2026 qarjy jylyna arnalǧan biudjet jobasy 2026 jyldyŋ basynda parlamenttıŋ qarauyna engızıledı.
