فوتو: Getty Images
ەۋرووداق كوشباسشىلارى 16 ساعاتقا سوزىلعان كەلىسسوزدەر بارىسىندا ۋكرايناعا ەۋروپادا بۇعاتتالعان رەسەي اكتيۆتەرى ەسەبىنەن قارجىلاي قولداۋ كورسەتۋ تەتىگى بويىنشا ورتاق شەشىمگە كەلە المادى. سوعان قاراماستان، ەو كيەۆكە 2026–2027 جىلدارعا ارنالعان 90 ملرد ەۋرو كولەمىندەگى قارجىلاي كومەكتى ماقۇلدادى. بۇل تۋرالى ۆۆس جازدى، دەپ حابارلايدى "ادىرنا".
بۇل قاراجات ەۋرووداق بيۋدجەتىمەن قامتاماسىز ەتىلەتىن قارىز ەسەبىنەن بولىنبەك. بۇل تۋرالى ۇزاق كەلىسسوزدەردەن كەيىن ەو ءسامميتىنىڭ توراعاسى انتونيو كوستا الەۋمەتتىك جەلىلەردە حابارلادى.
اگەنتتىك Reuters تانىسقان سامميت قورىتىندىسىنىڭ جوباسىنا سايكەس، قارجى كاپيتال نارىقتارىنان قارىز الۋ ارقىلى، ياعني ەو بيۋدجەتىنىڭ كەپىلدىگىمەن تارتىلماق. الايدا بۇل قاراجاتتىڭ ناقتى كوزدەرى رەسمي تۇردە ناقتىلانعان جوق.
ۋكراينانى قارجىلاندىرۋدىڭ باستاپقى جوسپارى ەۋروپادا بۇعاتتالعان رەسەيدىڭ ۆاليۋتالىق رەزەرۆتەرىن پايدالانۋعا نەگىزدەلگەن ەدى. جوسپارعا سايكەس، ۋكراينا بۇل قاراجاتتى نەسيە رەتىندە الىپ، ونى رەسەي سوعىس سالدارىنان كەلگەن شىعىن ءۇشىن رەپاراتسيا تولەگەننەن كەيىن عانا وتەۋى ءتيىس بولاتىن. قازىرگى باعالاۋلار بويىنشا، سوعىس سالدارىنان كەلگەن جالپى شىعىن 500 ملرد دوللاردان اسادى.
دەگەنمەن، بۇل باستاماعا ەو-عا مۇشە بىرنەشە ەل بىردەن قارسى شىقتى. پرورەسەيشىل ۇستانىمداعى چەحيا، ۆەنگريا جانە سلوۆاكيامەن قاتار، يتاليا دا كۇمان ءبىلدىردى. ال نەگىزگى قارسىلىقتى بەلگيا تانىتتى. سەبەبى ءدال وسى ەلدە ەۋروپادا بۇعاتتالعان رەسەي اكتيۆتەرىنىڭ باسىم بولىگى — 210 ملرد ەۋرونىڭ 193 ملرد ەۋروسى ساقتاۋلى تۇرعان Euroclear دەپوزيتاريى ورنالاسقان.
Financial Times باسىلىمىنىڭ كەلىسسوزدەرگە قاتىسى بار رەسمي تۇلعالارعا سىلتەمە جاساپ حابارلاۋىنشا، بەلگيا نەسيەنى قامتاماسىز ەتۋگە بايلانىستى بارلىق قارجىلىق تاۋەكەلدەر ءۇشىن اۋقىمدى كەپىلدىكتەر تالاپ ەتكەن. بۇل تالاپتار وزگە ەۋروپالىق كوشباسشىلار تاراپىنان قولداۋ تاپپاعان.
Reuters اگەنتتىگىنە پىكىر بىلدىرگەن ەۋروپالىق ديپلوماتتىڭ ايتۋىنشا، بۇل جاعدايدا ەو ۋكراينانى قۇتقارۋ ماسەلەسىنەن گورى، باستامانى قولداعان تاراپتاردىڭ ساياسي بەدەلىن ساقتاپ قالۋعا كوبىرەك نازار اۋدارعان.
وسىلايشا، ەۋرووداق رەسەي اكتيۆتەرىن تىكەلەي پايدالانۋدان باس تارتىپ، ۋكرايناعا قارجىلاي قولداۋدى بالاما مەحانيزم ارقىلى جۇزەگە اسىرۋعا شەشىم قابىلدادى.
